Charter Document - 06200230

A tous cels qui ces lettres verront ou orront Johan conte de Eu salut Comme hommes religieus l'abbe et le convent de Saint Michiel du Tresport deissent que il devoient avoir leur pors franzde pasnage en nostre forest de Eu par chartre qu'il ont de noz anceseurs en laquele chartre est contenu que il doivent avoir pasture franche a toutes leur bestes en la dite forest et nous deissiens que par ce mot de pasture il ne devoient mie avoir pasnage a leur pors en la dite forest nous fesons a savoir que nous voulons et otroions que les devant ditz religieus et leur successeurs aient viii pors franz de pasnage aveques la dite pasture chascun an en la dite forest pour la dite abbeye et pour leur manoirs et pour les fremiers mananz en leur manoirs de quelque part que les pors leur viengnent a fere leur volente ainsi que nous ne noz hoirs ne puissions es devant ditz viii pors pasnage demander Et voulons et otroions que les devant ditz religieus et leur successeurs tiengnent et poursiechent touz les achas que il ont fetz en nostre contee de Eu et touz les dons que on leur i a donnez jusqu'au jour d'hui Et voulons et otroions que les ditz religieus et leur successeurs aient et poursiechent franquement et quictement la moute qui fu du fie Aleaume de Ostremencort a Grantcort si comme il est contenu es chartres que il ont de nos anceseurs Et voulons et otroions que touz les dons et les confermemens que il ont de noz anceseurs leur soient bien tenuz et gardez paisiblement et pardurablement que les ditz religieus et leur successeurs tiengnent et poursiechent le devant dit pasnage et la dite pasture et tous les ditz achas et les dons et la dite moute bien franquement et paisiblement en franque et pure et perpetuel aumosne a tous jours Et voulons et otroions que les hommes de Mesnival du Mesnil Soret de Quesney de Hyoville de Flosques de Estalonde et du Mesnil Estellant voisent moudre a noz moulinz ou aus moulinz aus ditz religieus aus quels que il voudront ne ne pourront les hommes des dites villes aler moudre a autres moulins en tele maniere que nous ne noz heritiers ne les povons contraindre de aler moudre pour tant que il vueillent aler moudre aus moulinz aus ditz religieus ne les ditz religieus ne les pevent contraindre de aler moudre a leur moulins pour tant que il vueillent aler moudre a noz moulinz sauve nequedent la seque inoute que les hommes des dites villes rendent et rendront aus ditz religieus et a leur successeurs Et que ce soit ferme chose et estable en pardurablete nous avons ces lettres seellees de nostre seel Fetes au Parc en l'an de grace MCCIII et II ou mois d'aoust