Charter Document - 06200229

Sachent tous cheus qui ches lettres verront et orront que je Nichole dit Makerel bourgueis de Faleise ai donne en pure et pardurable aumosne a hommes relegieus l'abbe et le convent dou Treport tout l'eritage entierement que je aveie aquis en tout leur fie de le paroisse de Bazoches en quel lieu que che seit en mesons en terres en rentes et en toutes autres coses pour le sa[lu]t de m'ame a tenir et a aveir toutes les coses devant dites as dis [releg]ieus et a leur successeurs si comme je les aveie aquises et comme il est contenu es lettres que je aveie des aquas que je aveie fes lesqueles je ai renduesas dis relegieus franquement et quitement comme pure aumosne sans reclamation d'ore en avant de mei ou de mes heirs Et pour che que je wel que che seit ferme et estaule au tens a venir je ai ballie as dis relegieus ches lettres seelees de men seel Fet en l'an de grace MCC et octante et deus u jour de diemenche apres le Trinite Tesmoins mestre Jehan du Hen James Olivier Lorens Libert et autres