Charter Document - 06200223

Nous Estienne par le grace de Dieu abbe du moustier Saint Mikiel dou Treport et le convent de che meisme lieu a tous cheus qui ches lettres verront et orront salut en Nostre Segneur Sachies que nous avon ballie en fie et en heritage a Agnes dite le Page dou Treport tout chu fie entierement que Ricart dit le Page tint de nous en le paroisse Saint Jame dou Treport il est a saveir deus masures avec le edefices deseure mises et une pieche de terre des queles masures l'une est assise entre le masure Enguerran d'Abevile d'une partie et le masure Willaume Croquet de l'autre et l'autre est assise sous l'ettre Saint Jame entre le masure Michiel le viel d'une partie et le masure Marc Blondel de l'autre et le pieche de terre est assise entre le terre Willaume Coterel d'une partie et le terre Jehane des Mons fame Willaume de Preaus de l'autre et aboute a le hee du moulin a vent d'un bout et a le terre Michiel le Machecrier de l'autre pour lesqueles masures et pieche de terre le devant dite Agnes et ses heirs deivent rendre a nous et a nos successeurs heritelment cxviii sous de monneie courant de rente quescun an a quatre termes il es a saveir a le feste saint Remi xxix s vi d et au Nouel xxix s vi d et a le Pasque xxix s vi d et a l e Nativite saint Jehan Baptiste xxix s vi d a tenir et a aveir les dites masures et pieche de terre si comme il est devant dit et comme eles se proportent en lonc et en le a le dite Agnes et a ses heirs franquement et quitement et empes sans reclamation de nous ou de nos suscesseurs par le rente devant dite et a fere entdu tout en tout se volente sauve nostre dreiture et l'autrui Et nous devant dis abbe et convent a le dite Agnes et a ses heirs toutes les coses devant dites si comme il est devant dit contre tous sommes tenus warandir et esteit a saveir que se le rente devant dite n'esteit paie a nous et a nos suscesseurs as devant dis termes que nous pourrion fere nostre justiche seur tous les lieus devant dis par le rente et par l'amende et est encore a saveir que se le mer destruieit de riens le premiere masure devant nommee en cheste lettre avec les edefices par quei on n'i peust demourer que nous ou nos suscesseurs serion tenus a rabatre a le dite Agnes ou a ses heirs sexante sous de le rente devant dite quescun an par les termes devant dis autretant a l'un comme a l'autre et nous remaindreit le dite masure et les edefices deseure mises a fere du tout en tout nostre volente Et pour che que nous voulon que che seit ferme et estaule au tens a venir nous avon ballie a le dite Agnes ches lettres seelees de nos seaus Fetes en l'an de grace MCCLXXVII u jour de le feste saint Barnabe