Charter Document - 06200173

P[etrus] miseratione divina Rothomagensis archiepiscopus universis ad quos littere presentes pervenerint salutem in vero salutari Cum contentio verteretur coram nobis inter abbatem et conventum de Ulteriori Portu ex una parte et magistrum Nicholaum presbiterum ecclesie Sancti Jacobi de Ulteriori Portu ex altera super matutinis et duabus missis in Natali Domini et oblationibus earum et super Tenebris in Septimana penosa et ablutione in Cena Domini qua hora debet fieri communiter in aliis parrochiis et Cruce adoranda et ejus oblationibus et super servitio in vigilia Pasche et cereo ejusdem vigilie super custodia olei infirmorum unctionibus et legalis super processionibus pulsatione campanarum ad nonam et ad vesperas et uno modio bladi nos de assensu partium ordinavimus componendo quod dictus presbiter et ejus successores matutinas duas primas missas in Natali Domini de cetero parrochianis celebrabunt et oblationes habebunt earum Tenebras cantabunt Grucem adorare et omne officium in die Passionis Domini in ecclesia sua facient et oblationes ejusdem diei habebunt quod servitium in vigilia Pasche facient non pulsabunt ad Gloria in excelsis nisi prius pulsetur in abbatia denarios cerei communiter cum ministro abbate colligent et dicti abbas et conventus medietatem denariorum cerei habebunt de cetero et dictus presbiter et ejus successores aliam medietatem predictus presbiter et ejus successores de cetero custodiam olei habebunt et parrochianos suos inungent ministro abbatie advocato si commode possit haberi necessitate cogente ministro autem [non] presente parrochianos suos inungent processiones suas omnes facient diebus duplicibus in quibus parrochiani feriabantur ad nonam et ad vesperas predictus presbiter et successores ejus ante abbatiam non pulsabunt in aliis diebus hora competenti pulsabunt in vigilia beati Jacobi apostoli et in die predictus presbiter et ejus successores ad quamlibet horam pro voluntate sua pulsabunt De legatis ita ordinatum est quod si solum presbitero parrochiali fiant legata ea solum per se habebit si solum fabrice ecclesie sue fabrica solum per se habebit si solum presbitero parrochiali aut fabrice ecclesie sue insimul ea per se habebunt Simili modo de monachis si aliqua solum fuerint legata monachis ea per se habebunt si fabrice solum eorum monachorum solum fabrica per se habebit si monachis aut fabrice sue ecclesie solum ipsi solum per se habebunt si autem aliqua eis insimul legata fuerint ea inter se equaliter divident si autem tam uno quam alio legetur quilibet habeat quod sibi legatum fuerit si autem presbitero parrochiali plus et monachis minus inter se equaliter divident si autem monachis plus et presbitero minus inter se equaliter divident si etiam presbitero parrochiali et fabrice ecclesie sue plus et monachis minus inter eos equaliter dividetur ita quod presbiter et fabrica ecclesie sue habebunt duas partes et monachis tertiam si monachis et fabrice sue ecclesie plus et presbitero minus equaliter inter eos dividetur ita quod monachi et fabrica ecclesie sue habebunt duas partes et presbiter tertiam Si vero quis intestatus decesserit tertia pars partis sue pauperibus erogetur et due partes presbitero et ecclesie sue et monachis et ecclesie sue communiter et equaliter dividantur Modium bladi non de meliori nec de pejori presbiter predictus et ejus successores ab abbate et conventu singulis annis infra festum Omnium Sanctorum in abbatia percipient Ad hec autem facienda et fideliter observanda predictus Nicholaus juramento corporaliter prestito se obligavit et ejus successores ad hoc simili modo tenentur se obligare Et ut ista firma permaneant presentem cartam sigilli nostri munimine dignum duximus roborari Actum apud Albemalliam in crastino octabarum Epyphanie anno Domini MCCXXXVIII