Charter Document - 06200008

Quoniam vita hominum brevis et memoria eorum labilis antiquitas res gestas scriptis annotare curavit Idcirco ego Dei gratia abbas de Ulteriori Portu patrum sequens vestigia cum consilio et assensu totius nostri capituli notum facere volumus tam presentibus quam futuris fratres Hospitalis Jerusalem in ecclesiam et terram quam habemus ab antiquo Campis et Deo annuente ab hoc die adquirere poterimus in perpetuum associare eo tenore ut medietatem habeant in terragio et omnibus terre et ecclesie reditibus videlicet decimis oblationibus et donis tam vivorum quam mortuorum nos vero habebimus medietatem in omnibus supradictis et etiam in omnibus que fratres Hospitalis infra parrochiam gratis acquirere poterunt Si vero nos vel ipsi fratres quamlibet terram infra parrochiam pretio vel vadimonio vel censu adquirere poterimus communiter dabitur communiterque possidebitur Presbiter vero in memorata ecclesia non ponatur donec communiter concedatur Idcirco hanc concessionem sigillo nostro firmavimus ut ipsi fratres villam edificent hospites ponant totamque villam et hospites habeant exceptis illis que ad nostram ecclesiam pertinent sed monachi ibidem Deo servientes in furno et camba absque furnagio et cambagio panem et cerveisiam facient ad proprium usum et ligna et servientes invenient Iterum nos monachi volentes fieri participes orationum que fiunt Jerusalem concedimus dictis fratribus medietatem omnium decimarum et terrarum quas habemus in villam de Goi vel in futurum habebimus Actum est hoc anno MCXLI ab Incarnatione Domini