Charter Document - 06191048
| Charter Number: | 06191048 |
|---|---|
| Cartulary Title: | Registrum Monasterii de Passalet |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1272 |
| Date type: | Assigned |
| Resource Link(s): |
Reference Document for this Embedded Document People of Medieval Scotland |
Charter:
Omnibus Christi fidelibus presens scriptum visuris vel audituris frater Stephanus dictus abbas de Passelet et ejusdem loci conventus salutem in Domino sempiternam Noverit universitas vestra nos cum essemus gravi onere eris alieni obligati dedisse concessisse et presenti carta nostra confirmasse de communi consilio et consensu totius capituli nostri Thome de Fulton pro quadam pecunie summa quam in utilitatem monasterii nostri et exonerationem debitorum nostrorum profitemur esse conversam totam terram ad pontem de Kert quam Stephenus Marescall quondam de nobis tenuit et illas duas terras quas Laurentius Carpentarius de nobis tenuit dum viveret Tenendas et habendas predictis Thome et Matilde uxori sue et eorum heredibus de nobis et monasterio nostro libere quiete plenaria et honorifice cum omnibus pertinentiis libertatibus et aisiamentis et per divisas die hujus conventionis inite obtentas quousque terra de Fulton quam de nobis tenet dominus Antonius miles per cessum vel decessum ipsius ad usus nostros et proprietatem revertatur et quam terram de Fulton predicti Thomas et Matilda uxor sua et eorum heredes tunc de nobis et monasterio nostro tenebunt pro ut in scripto super hoc inter nos confecto plenius continetur Et tunc predicte terre ad pontem de Kert et quas prenominatus Laurentius de nobis tenuit ad nos et monasterium nostrum libere et sine omni contradictione inquietatione et perturbatione ex parte dictorum Thome et Matilde uxoris sue et heredum suorum revertentur ita quod predicti Thomas et Matilda uxor sua seu eorum heredes post cessum vel decessum predicti domini Antonii in predictis terris ad pontem de Kert et quas predictus Laurentius tenuit nichil juris ratione hujus conventionis seu auctoritate scripti presentis vel aliquo jure judicio casu seu statuto contingentibus exigere poterunt vel clamare et predicti Thomas et Matilda uxor ejus et eorum heredes solvent usque ad tempus prescriptum singulis annis de predictis terris nobis et monasterio nostro viginti solidos argenti ad duos anni terminos videlicet medietatem ad festum Sancti Martini et aliam medietatem ad festum Pentecostes pro omni servitio et demanda salvis nobis de omnibus hominibus infra predictas terras habitantibus placitis vite et membrorum et blodwite cum escetis suis et salva nobis piscaria nostra de Lincleve et potestate pacifica eam firmandi et reficiendi quotiens totiens necesse fuerit et nobis viderimus expedire Et predicti Thomas et heredes sui sectam facient ad curiam nostram continue quamdiu de nobis terras tenent prenominatas Et si forte nos vel aliquis successorum nostrorum contra hanc concessionem venire voluerimus predictis Thome et Matilde uxori sue et eorum heredibus nomine pene centum libras sterlingorum ante litis ingressum persolvemus Et ad hanc concessionem et collationem firmiter observandam subjecimus nos monasterium nostrum et omnia bona nostra jurisdictioni et coertioni domini episcopi Glasguensis qui pro tempore fuerit vel capituli si sedes vacaverit ut nos possit per censuram ecclesiasticam modis omnibus quibus melius viderit expedire tam ad solutionem pene si committatur quam ad observationem omnium premissorum compellere nullo juris canonici vel civilis beneficio nobis reniti volentibus valituro Et ad majorem securitatem presens scriptum sigillo capituli nostri fecimus roborari Hiis testibus domino Galfrido capellano Willelmo Logan et Johanne de Knoc presens scriptum roborari feci
Source (click image below to view full size)
