Charter Document - 06190377

Clemens episcopus servus servorum [Dei] venerabili fratri Episcopo Dunblanensi et dilectis filiis Abbati monasterii de Driburg Sancti Andree dioecesis et magistro Rogero de Derby precentori ecclesie Aberdonensis salutem et apostolicam benedictionem Sua nobis dilecti filii Abbas et conventus monasterii de Passelet Cluniacensis ordinis Glasguensis dioecesis petitione monstrarunt quod cum quondam Duncanus comes de Karric jus patronatus ecclesie Sancti Oswaldi de Turnbery et quarundam aliarum ecclesiarum terras possessiones et alia bona ad ipsum spectantium in Glasguensi dioecesi eis intuitu pietatis inperpetuum elemosinam contulisset constructo in ipsis possessionibus quodam oratorio in quo idem Abbas et conventus fecerunt per multa tempora per quosdam de suis monachis de serviri postmodum dicto Comite asserente quod ipse ipsarum patronatus jus terras possessiones et bona predicta eisdem Abbati et conventui sub ea conditione contulerat ut in dictis possessionibus construeretur monasterium ordinis supradicti cui ecclesie terre possessiones et bona assignarentur predicta et movente super hiis ipsis Abbati et conventui questionem tandem partes ordinationi bone memorie Glasguensis Episcopi loci dioecesani super hiis se totaliter submiserunt eisdem Abbate et conventu renunciantibus beneficio restitutionis in integrum et omni juris auxilio canonici et civilis et litteris a sede apostolica impetrandis dictus vero Episcopus de partium ipsarum et capituli Glasguensis assensu ordinavit quod in hujusmodi possessionibus construeretur monasterium quod Crosragmol voca[re]tur de monachis monasterii supradicti qui sibi per canonicam electionem libere possint abbatem eligere et quod predictum monasterium taliter construendum a potestate et jurisdictione Abbatis et conventus dicti monasterii de Passelet in omnibus sit exemptum nisi in ordinis et habitus conformatione et observatione et quod Abbas de Passeleto qui pro tempore fuerit predictum monasterium de Crosragmol semel visitet annuatim Ordinavit etiam quod omnia bona que aliquando Abbas et conventus prefati monasterii de Passelet habuerunt in Karric perpetuo cederent in usus predicti monasterii taliter construendi et quod Abbas et conventus qui essent pro tempore in hujusmodi monasterio eisdem Abbati et conventui de Passelet pro omnibus predictis singulis annis decem marcarum sterlingorum annuum redditum solverent et quod ipse Episcopus et successores sui partes ad observationem ordinationis hujusmodi possent de plano et sine strepitu judicii monitione premissa per censuram ecclesiasticam coartare Quare dicti Abbas et conventus monasterii de Passelet nobis humiliter supplicarunt ut cum hujusmodi ordinatio redundet in ipsius monasterii de Passelet lesionem enormem providere super hiis ipsis per beneficium restitutionis in integrum paterna sollicitudine curaremus Ideoque discretioni vestre per apostolica scripta mandamus quatenus vocatis qui fuerint evocandi si vobis constiterit prefatum monasterium de Passelet ex ordinatione hujusmodi enormem sustinere jacturam eo et dictis Abbate et conventu adversus ordinationem eandem hujusmodi renunciationibus ac instrumentis super hoc confectis et aliis premissis nequaquam obstantibus sicut justum fuerit in integrum restitutis audiatis causam et eam infra annum judicio vel concordia si de partium voluntate processerit terminare curetis facientes quod decreveritis per censuram ecclesiasticam firmiter observari alioquin causam ipsam instructam vel non instructam remittatis ad apostolice sedis examen prefixo partibus termino peremptorio competenti quo per se vel procuratores ydoneos cum omnibus munimentis et rationibus suis causam hujusmodi contingentibus apostolico se conspectui representent facture ac recepture super hiis quod ordo dictaverit rationis Testes autem qui fuerint nominati si se gratia odio vel timore subtraxerint per censuram eandem appellatione cessante cogatis veritati testimonium perhibere non obstante si aliquibus a sede sit indultum eadem quod interdici suspendi vel excommunicari non possint per litteras apostolicas non facientes plenam et expressam de indulto hujusmodi mentionem sive qualibet alia dicte sedis indulgentia per quam effectus presentium impediri valeat vel differri et de qua in nostris litteris fieri debeat mentio specialis Diem vero prefixionis hujusmodi et quicquid feceritis in premissis nobis per vestras litteras harum seriem continentes fideliter intimetis Quod si non omnes hiis exequendis potueritis interesse duo vestrum ea nihilominus exequantur Datum Perusii viii Idus Februarii pontificatus nostri anno primo