Charter Document - 06190366

Innocentius episcopus servus servorum Dei dilectis filiis Priori et conventui Sancti Jacobi de Passelet Cluniacensis ordinis salutem et apostolicam benedictionem Sacrosancta Romana ecclesia devotos et humiles filios ex assuete pietatis officio propensius diligere consuevit et ne pravorum hominum illicitis gravaminibus molestentur eos protectionis sue munimine tanquam pia mater est solita confovere quatinus erga Romanam ecclesiam tanto devotiores existant quanto majorem ab ea gratiam se noverint assecutos Ea propter dilecti in Domino filii devotionem quam erga beatum Petrum et nos ipsos habere dinosci minii attendentes monasterium Sancti Jacobi de Passelet in quo divino mancipati estis obsequio ac personas vestras cum omnibus que impresentiarum juste ac rationabiliter possidetis aut in futurum justis modis Deo propitio poteritis adipisci sub beati Petri et nostra protectione suscipimus Specialiter autem ecclesiam de Cathkert ecclesiam de Ruthglen ecclesiam de Curmannoc ecclesiam de Kelberchan ecclesiam de Mernes ecclesiam de Polloc cum terris et decimis et omnibus ipsarum ecclesiarum proventibus sicut eas juste et pacifice possidetis et sicut vobis eas bone memorie Jocelinus Glasguensis ecclesie episcopus in usus proprios contulit et carta sua confirmavit vobis et per vos monasterio vestro auctoritate apostolica confirmamus et presentis scripti patrocinio communimus Statuimus etiam ut nullus in personas vestras vel in vicarios vestros excommunicationis vel suspensionis aut in ecclesias vestras vel in capellas ad eas spectantes interdicti sententiam nisi ordine juris observato audeat promulgare Quod si secus a quoquam in vos ausu temerario fuerit promulgata eam a vobis observari districte prohibemus Inhibemus insuper ne episcopo vestro archidiacono decano vel eorum officialibus monasterium vestrum vel ecclesias vestras aliquibus conviviis vel exactionibus seu taleis vel equitaturis preter quam statutum est in Lateranensi concilio [liceat] pergravare Nulli ergo omnino hominum liceat personas vestras vel ministros ecclesiarum vestrarum vel bona vestra temere perturbare vel vobis sine inscriptione crimen imponere seu hanc paginam vestre protectionis confirmationis constitutionis inhibitionis infringere vel ei aliquatenus ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Rome apud Sanctum Petrum vii Idus Decembris pontificatus nostri anno nono