Charter Document - 06190361

Bonifacius episcopus servus servorum Dei dilectis filiis Abbati et conventui monasterii de Passelet Cluniacensis ordinis Glasguensis dioecesis salutem et apostolicam benedictionem Ex parte vestra fuit propositum coram nobis quod nonnulli clerici et laici asserentes se in vos aliquid questionis habere aliquando monachos interdum conversos et nonnunquam animalia et alia bona monasterii vestri pretextu cujusdam prave consuetudinis temeritate propria vadiare invadere ac tamdiu detinere presumunt donec sit eis de ejusmodi questionibus juxta ipsorum beneplacitum satisfactum quamvis jurisdictionem qua hoc possint in vos non habeant ordinariam seu etiam delegatam Cum itaque judicialis vigor sit ideo in medio constitutus ut nemo sibi sumere audeat ultionem et id tanquam nullo jure subnixum non sit ali quatinus tolerandum nos volentes quieti vestre consulere ac predictorum malitiis obviare auctoritate presentium districtius inhibemus ne quis occasione predicte consuetudinis vobis memoratas inferre molestias ac bona monasterii antedicti absque juris ordine occupare vadiare invadere seu quomodo libet detinere presumat Nulli ergo omnino hominum liceat hanc paginam nostre inhibitionis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Laterani xii Kalendas Januarii pontificatus nostri anno septimo