Charter Document - 06190351
| Charter Number: | 06190351 |
|---|---|
| Cartulary Title: | Registrum Monasterii de Passalet |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1286 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Omnibus ad quorum aspectum presens scriptum pervenerit Adam dictus de Cardelechan quondam burgensis ville Glasguensis salutem in Domino sempiternam Quoniam ex usu venit et jura volunt ut ea que rationabiliter et debito modo fiunt in scriptis redigantur ad notitiam et memoriam posterorum hinc est quod universitati vestre presentibus notum facio et significo me ad tantam paupertatis inopiam devenisse quod sine venditione burgagii mei quod aliquo tempore in predicto burgo habui in vico que dicitur vicus piscatorum de prope pontem de Clud de paupertate mea relevari non potui nec vitam competentem [habere] omnibus bonis mobilibus prius venditis et expositis et ne factum meum aliquo tempore calumpniari poterit forma juris in omnibus observata burgagium meum prenominatum coram communitate burgensium ville prenominate semel secundo et tertio [post] intervalla dierum heredibus meis per omnibus legitime obtuli venale sicut jura volunt et exigunt qui cum non haberent unde predictum burgagium comparare poterant ego Adam predictus necessitate compulsus que legem non patitur cum aliunde non haberem unde vite mee alimenta nisi mendicando adquirere predictum burgagium coram communitate ville predicte in placito suo habito die Martis proxima ad festum Sancti Cuthberti episcopi et confessoris in quadragesima anni gratie MCCLXXXV pro me et heredibus meis religiosis viris Abbati et conventui de Pasleto concessi vendidi et quietum clamavi inperpetuum cum omni jure quod mihi vel heredibus meis vel alicui alio in predicto burgagio cum pertinentiis nomine nostro competit competiit vel aliquo tempore competere poterit impostorum aliquo jure vel judicio contingentibus propter quandam pecunie summam mihi solutam quam quidem pecunie summam fateor me plene et integre recepisse et in utilitatem meam et heredum meorum esse conversam Et renunciavi expresse pro me et heredibus meis et quolibet nostrum in hoc facto omnibus litteris generalibus et specialibus a quocunque foro impetratis vel impetrandis et omni beneficio juris canonici et civilis et omnibus aliis que contra tenorem hujus instrumenti obici poterunt vel opponi Insuper subposui et subpono me et heredes meos et quemlibet nostrum jurisdictioni et coercioni domini Episcopi Glasguensis et ejus officialis qui pro tempore fuerit ut ambo vel alter ipsorum possint vel possit nos et quemlibet nostrum ad observationem hujus instrumenti in quolibet articulo per censuram ecclesiasticam de plano et sine strepitu judiciali compellere ex sola inspectione hujus instrumenti Et ne ceca oblivione depereat quod coram communitate predicta factum est et recognitum gratia majoris testimonii ad instantiam meam quia sigillum meum non est autenticum nec est notorium presens scriptum communi sigillo predicti burgi et sigillo officialitas curie Glasguensis unacum sigillo meo roborari procuravi Hiis testibus []
Source (click image below to view full size)
