Charter Document - 06190341

Pateat universis presentes litteras inspecturis quod ego Willelmus de Bonkel burgensis de Glasgw pro me et heredibus meis concessi et vendidi religiosis viris Abbati et conventui monasterii de Pasleto totam terram meam cum pertinentiis jacentem infra burgum de Glasgw in vico qui vocatur Ratonraw inter terram domini Mauricii Starine capellani ex parte occidentali et stratam regiam que dicitur le Weynde ex parte orientali pro quadam summa pecunie mihi per dictos religiosos pre manibus totaliter persoluta Quam quidem terram cum pertinentiis Gilbertus de Camera paupertate secundum legem burgorum probata coactus obtulit propinquioribus parentibus et amicis ad tria placita capitalia vendendam et quam terram cum pertinentiis idem Gilbertus in defectu parentum et amicorum mihi vendidit ad opus meum et heredum meorum et assignatorum meorum Cujus quidem terre cum pertinentiis saisinam recuperavi pro me et heredibus meis et assignatis meis de consensu dicti Gilberti per prepositos et ballivos dicti burgi hora diei legitima cum in tolle et oute tolle in presentia duodecim burgensium et vicinorum dicti burgi ad hoc specialiter vocatorum et ipsa saisina gavisus sui pacifice per annum unum et diem sine clameo alicujus Et ego Willelmus et heredes mei dictam terram cum pertinentiis dictis religiosis secundum quod lex burgorum exigit et requirit contra omnes homines et feminas warantizabimus et defendemus Preterea obligo me et heredes meos et successores meos quoscunque solvere fabrice majoris ecclesie Glasguensis decem libras sterlingorum nomine pene et dictis religiosis alias decem libras sterlingorum nomine dampnorum suorum et interesse absque aliquo strepitu judiciali nullo proponendo obstante quotienscunque contigerit nos vel aliquem nostrum contra presentem venditionem sive contra aliquem articulum in presentibus litteris contentum in foro ecclesiastico vel civili in toto vel in parte movere seu moveri facere questionem presenti nihilominus venditione mea in suo robore duratura Renunciando pro me et heredibus meis et successoribus nostris quibuscunque omni prosecutioni et actioni exceptioni cavillationi regie prohibitioni litteris regiis impetratis seu impetrandis omni privilegio crucesignato vel cruce signandis indulto vel indulgendo et omni juris remedio tam canonici quam civilis que nobis vel alicui nostrum in premissis vel aliquo premissorum prodesse et dictis religiosis obesse poterunt in futurum Et ad omnia et singula in presentibus litteris contenta fideliter et integre tenenda et per implenda fidem pro me et heredibus meis et successoribus nostris quibuscunque prestiti corporalem subjiciendo nos et quemlibet nostrum coercioni Officialis curie Glasguensis qui pro tempore fuerit quod possit nos et quemlibet nostrum per censuram ecclesiasticam legitima monitione premissa compellere ad tenendum et implendum omnia et singula que in presentibus litteris continentur In cujus rei testimonium sigillum meum unacum communi sigillo dicti burgi et sigillo officialitas curie supradicte ad requisitionem meam causa majoris evidentie est appensum Teste communitate burgi supradicti