Charter Document - 06190337

Omnibus hanc cartam visuris vel audituris Gilbertus dictus de Camera burgensis de Glasgw eternam in Domino salutem Quia me cogit necessitas et inopia inevitabilis pro sustentatione mea prout probatum est coram communitate burgi Glasguensis secundum legem et consuetudinem burgorum quoddam burgagium meum cum pertinentiis suis jacens infra burgum Glasguensem in vico qui dicitur Ratonraw inter viam regalem ex parte orientali et terram domini Mauricii capellani dicti Starine ex parte occidentali vendere et alienare Noverit universitas vestra me dictum burgagium cum pertinentiis legitime optulisse vendendum secundum legem et consuetudinem burgorum ad tria placita capitalia burgi Glasguensis propinquioribus parentibus meis et amicis et quia nullus de parentibus meis et amicis apparuit qui dictum burgagium cum pertinentiis voluit emere vel facere mihi pro eodem quod lex dictat et consuetudo burgorum ego vero Gilbertus predictus dictum burgagium cum omnibus pertinentiis per suas rectas divisas concessi et inperpetuum vendidi ac venditionem meam presenti scripto meo confirmavi Nicholao dicto Sprowll burgensi de Glasgw pro quadam summa pecunie quam mihi per manibus idem Nicholaus integre solvit tradidit et pacavit in mea magna necessitate notoria et urgente inopia Tenendum et habendum eidem Nicholao heredibus suis et assignatis adeo libere quiete pacifice et honorifice cum omnibus pertinentiis suis libertatibus et aisiamentis sicut ego vel predecessores mei aliquo tempore dictum burgagium cum pertinentiis liberius quietius et honorificentius de domino Episcopo Glasguensi tenuimus vel tenere potuimus Ego vero Gilbertus et heredes mei dictum burgagium cum pertinentiis et libertatibus dicto Nicholao et heredibus et assignatis contra omnes homines et feminas warantizabimus acquietabimus et inperpetuum defendemus Et ad hanc venditionem et venditionis confirmationem fideliter observandam tactis sacrosanctis evangeliis eidem Nicholao fidem meam prestiti corporalem Si vero contingat quod absit me vel aliquem heredum meorum contra presens factum meum aliquo tempore venire volo et concedo pro me et heredibus meis quod dominus officialis curie Glasguensis qui pro tempore fuerit per solam inspectionem presentis instrumenti sine aliqua lite vel judicio in me et heredes meos sententias suspensionis et excommunicationis possit promulgare easdem non relaxans quousque centum solidos sterlingorum nomine pene fabrice ecclesie Glasguensis et alios centum solidos eidem Nicholao et heredibus suis et assignatis nomine dampnorum suorum et expensarum persolverimus quotiens contra istud factum meum et venditionem presumpserimus venire presenti nihilominus scripto in suo pleno robore duraturo Et ad omnia premissa in omnibus articulis fideliter inperpetuum observanda me heredes meos et assignatos et omnia bona nostra mobilia et immobilia habita et habenda predicto Nicholao heredibus et assignatis suis per tenorem presentium obligavi et obligo renuncians in hoc facto pro me et heredibus meis et assignatis omni juris remedio tam canonici quam civilis et privilegio cruce signato indulto vel indulgendo et omni exceptioni cavillationi et maxime regie prohibitioni et omnibus aliis litteris a quacunque curia vel persona impetratis vel impetrandis et omnibus aliis et singulisque michi et heredibus meis contra premissa in aliquo possint prodesse et dicto Nicholao et heredibus suis vel suis assignatis obesse In cujus rei testimonium tam ad instantiam et petitionem meam quam dicti Nicholai sigillum commune burgi Glasguensis unacum sigillo officialitas Glasguensis et sigillo domini Archidiaconi eiusdem et sigillo meo proprio presenti carte est appensum Hiis testibus Johanne Dunber Johanne de Gowan Johanne Plumer Johanne Scot Johanne Heltrer Waltero Pellipario Johanne Aurifabro et tota communitate burgi Glasguensis et multis aliis