Charter Document - 06190331

Omnibus Christi fidelibus presens scriptum visuris vel audituris Cecilia quondam sponsa Johannis de Perthec salutem Noverit universitas vestra quod cum ego Cecilia et heredes mei ex predicto Johanne procreati gravi essemus paupertate oppressi in libera viduitate mea de consensu et bona voluntate mea concessi dedi et hoc presenti scripto renunciavi et quietum clamavi Abbati et conventui de Pasleto totum jus quod mihi et heredibus meis competiit vel competere poterit inperpetuum in tota terra que jacet in villa de Ruthglen inter terram Willelmi de Bygres ex parte una et terram Walteri filii Walteri Ruhe ex altera ex aquilonale parte inter cimiterium ecclesie sancte Marie Virginis et aquam de Clud in predicta villa de Ruthglen quam quidem terram predictus Johannes maritus meus et ego aliquando possedimus et dictis Abbati et conventui pro magna paupertate et necessitate nostra vendidimus omnibus aliis terris nostris prius expositis et venditis Et pro hac renunciatione concessione et quieta clamatione predicti Abbas et conventus mihi caritatis intuitu dederunt tres celdras farine avene in magna necessitate mea ad sublevationem inopie mee et heredum meorum Unde volo et concedo pro me et heredibus meis quod predictus Abbas et conventus totam terram predictam habeant teneant et possident libere et pacifice sine omni calumpnia gravamine et molestia ex parte mea vel heredum meorum inperpetuum ita quod ego vel heredes mei seu aliquis nomine nostro nichil juris seu hereditatis in predicta terra exigere vel vindicare poterimus aliquo tempore nullo jure judicio seu casu intervenientibus Et ad hanc concessionem et quietam clamationem fideliter observandam pro me et heredibus meis sacramentum prestiti corporale die Lune proxima post ascensionem Domini anni gratie MCCLXII in plena curia burgi de Ruthglen Et obligo meet heredes meos ad solutionem decem librarum sterlingorum nomine pene predictis Abbati et conventui faciendam ante litis ingressum si aliquo tempore contra hanc renunciationem et quietam clamationem venire presumamus Et subicio me et heredes meos jurisdictioni domini Episcopi Glasguensis vel ejus Archidiaconi qui pro tempore fuerit ut ambo vel alter eorum possint vel possit nos per censuram ecclesiasticam compellere ad predicta omnia fideliter observanda et solvenda In cujus rei testimonium presenti scripto sigillum meum apposui Hiis testibus domino Thoma Crock milite domino Thoma vicario de Ruthglen Willelmo de Kathkert fratre meo Ricardo de Mernes Henrico Constabilario prepositis de Ruthglen Thoma Tinctore Ada Pictore et Philippo filio Henrici Roberto Clerico et aliis