Charter Document - 06190325

Anno gratie MCCXXV facta est hec conventio inter dominum Willelmum [abbatem] et conventum de Pasleto ex parte una et inter Hugonem filium Reginaldi militem ex altera super controversia mota inter ipsos de terra illa que vocatur Achinchoss in feudo ipsius Hugonis militis quam predicti Abbas et conventus ad ecclesiam eorum de Kilhelan pertinere dicebant scilicet quod predictus Hugo et heredes sui prescriptam terram omni sopita calumpnia tenebunt inperpetuum de domo de Pasleto Reddendo annuatim dimidiam marcam argenti supradictis monachis apud Passeleth ad luminare ecclesie sue scilicet medietatem ad Pentecostem et medietatem ad festum Sancti Martini Predicti etiam monachi pro se et Rogero tunc temporis predicte ecclesie de Kilhelan vicario et pro suis successoribus inperpetuum et prefatus Hugo pro se et heredibus suis firmiter pepigerunt quod predicte compositioni stabunt inperpetuum Supradicti etiam monachi predictam terram de Achinchos warantizabunt contra omnes vicarios ecclesie de Kilhelan dicto Hugoni et heredibus suis inperpetuum Si vero dictus Hugo et heredes sui terminis supradictis a solutione firme cessaverunt dimidiam marcam nomine pene cum firma ad terminum non soluta persolvent Et ad majorem hujus rei securitatem et ut ipsa compositio ex utraque parte firmius et stabilius teneatur presens scriptum ad modum cyrographi est confectum cujus una pars sigillo capituli autentico de Pasleto signata penes dominum Hugonem militem et heredes suos altera vero sigillo ipsius militis impressa penes Abbatem et conventum de Pasleto remanet perpetuo reservanda Et etiam ut ipsa compositio munimine majori roboretur venerabilis pater Walterus Dei gratia Glasguensis episcopus ad petitionem partium auctoritate episcopali compositionem eandem confirmavit Hiis testibus domino Roberto Tyndal thesaurario Glasguensi domino Johanne de Kilberhan decano de walle Clud domino Petro de Perthec Roberto cancellario Luca capellano Johanne filio Petri de Perthec Alexandro de Smalham clerico