Charter Document - 06190303
| Charter Number: | 06190303 |
|---|---|
| Cartulary Title: | Registrum Monasterii de Passalet |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1232 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Gregorius [episcopus] servus servorum Dei dilectis filiis Abbati et conventui de Passelet Cluniacensis ordinis Glasguensis dioecesis salutem et apostolicam benedictionem Cum a nobis petitur quod justum est et honestum tam vigor equitatis quam ordo exigit rationis ut id per solicitudinem officii nostri ad debitum perducatur effectum Ex vestra siquidem parte fuit propositum coram nobis quod cum inter vos ex parte una et venerabilem fratrem nostrum Episcopum et capitulum Glasguense ex altera super taxandis vicariis in ecclesiis quas in Glasguensi dioecesi obtinetis coram bone memorie Hugone Lesmorensi episcopo et conjudicibus suis auctoritate apostolica questio verteretur tandem de ipsorum assensu judicum fuit super hoc necnon super procurationibus ac aliis ecclesiarum ipsarum oneribus hinc inde in magistrum Hugonem archidiaconum Glasguensem et ejus collegas tanquam in arbitros compromissum qui equum super hiis arbitrium protulerunt Nos ergo vestris justis supplicationibus inclinati arbitrium ipsum sicut est equum et a partibus sponte receptum ac in confectis inde litteris dicitur contineri auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Spoleti iiii Idus Junii pontificatus nostri anno sexto
Source (click image below to view full size)
