Charter Document - 06190301

Clemens episcopus servus servorum Dei dilectis filiis Abbati et conventui monasterii de Passeleth Cluniacensis ordinis Glasguensis dioecesis salutem et apostolicam benedictionem Desideriis vestris in hiis affectu benivolo debemus annuere que vos digne possint a dispendiis preservare Sane petitio vestra nobis exhibita continebat quod sepe contingit quod locorum ordinarii ad lucrum proprium inhiantes et pretendentes aliquando quod ecclesie quas in usus proprios obtinetis defectum in edificiis ornamentis et rebus aliis patiuntur proventus earundem ecclesiarum ad vos spectantes occasione hujusmodi et alias in casibus non concessis a jure sequestrari faciunt pro sue libito voluntatis proventus ipsos durante tempore sequestrationis non in utilitatem dictarum ecclesiarum seu circa correctionem aut emendationem defectuum earum sed in usus proprios convertentes et interdum hujusmodi sequestratum etiam postquam correcta seu emendata sunt ea quorum occasione proventus hujusmodi sequestrarunt relaxare nolunt nisi prius eis solveritis emende nomine non modicam pecunie quantitatem Nos itaque vestris supplicationibus inclinati auctoritate vobis presentium indulgemus ut predicti proventus occasione hujusmodi seu alias in casu non permisso a jure per ordinarios ipsos nequeant sequestrari et si forte dicti ordinarii eos contra hujusmodi indultum sequestraverint illos vobis postquam correcta fuerint ea propter que sequestratio ipsa fiet nulla hujusmodi eis ad ipsorum lucrum emenda prestita restituere libere teneantur Nulli ergo omnino hominum liceat hanc paginam nostre concessionis infringere vel ei ausu temerario contraire Siquis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Perusii Idibus Junii pontificatus nostri anno primo