Charter Document - 06190290

Omnibus Christi fidelibus tam presentibus quam futuris Willelmus permissione divina Glasguensis episcopus salutem in Domino Noverit universitas vestra quod cum tempore bone memorie domini Walteri episcopi antecessoris nostri ordinatio facta fuisset inter ecclesiam Glasguensem ex parte una et monasterium de Passelet ex altera per viros idoneos ex utraque parte ad hoc electos super procurationibus que Episcopo debebantur de ecclesiis in instrumento ipsius ordinationis nominatis videlicet de ecclesiis de Kilpatrik de Neuit de Innirkip de Kilmalcolm de Kilelan de Houston de Kilberchan de Neliston de Polloc de Mernis de Ruthirglen de Catkert de Curmannoc de Prestwic monachorum de Prestwic burgi de Cragin et de Turnebirie tandem dicti ordinatores ad perpetuam pacem inter partes habendam moderando providerunt septem hospitia nomine procurationum dicto Episcopo et ejus successoribus de dictis ecclesiis exhiberi et in hujus moderationis recompensationem ordinaverunt ut proventus ecclesie de Irskyn que tunc fuit monachorum perpetuo cederent in usus dicti Episcopi et ejus successorum Postmodum vero tempore nostro cum dicta septem hospitia nobis nomine procurationum singulis annis fieri peteremus ipsis monachis reclamantibus et renitentibus pretextu cujusdam instrumenti a predicto antecessore nostro optentis per quod dicebant se non nisi alternis annis ad dictas procurationes faciendas teneri ad sopiendam omnem contentionem inter ecclesiam Glasguensem et dictum monasterium de Passelet de auctoritate nostra et sollempni assensu capituli nostri in hunc modum convenit videlicet quod omnes predicte ecclesie inperpetuum erunt immunes et exempte omnino a prestatione procurationum ad nos et successores nostros pertinentium et nos et successores nostri cum expedire viderimus predictas ecclesias propriis sumptibus nostris visitabimus de proventibus predicte ecclesie de Irskyn et de redditu viginti [marcarum] annuarum quas dicti Abbas et conventus nobis et successoribus nostris assignaverunt percipiendas perpetuo per manum vicarii de Kilpatrik primo termino solutionis incipiente anno gratie M ducentesimo quadragesimo in festo Sancti Johannis sub pena unius marce quolibet die quamdiu cessatum fuerit in solutione Et dicti Abbas et conventus tam ad penam quam ad redditum proventus ecclesie de Kilpatric nobis et successoribus nostris [se] obligaverunt Et si forsan nos vel aliqui successorum nostrorum voluerimus duo hospitia nobis providebunt in Stragris et in Levenax apud aliquas predictarum ecclesiarum ad mandatum Episcopi tempestivum dummodo nos vel Episcopus qui pro tempore fuerit promiserimus quatuor marcas pro quolibet hospitio quod si non fecerimus volumus eos ad hoc providendum non teneri Volumus etiam ut vicarie predictarum ecclesiarum sicut per ordinatores prius taxate fuerunt in robore suo perpetuo consistant sine aliqua [diminutione] et a procurationibus ad nos et successores nostros pertinentibus omnino sint exempte Et Abbas et conventus ratione ipsius exemptionis de dictis vicariis nichil exigent vel diminuent vel extorquere presument In quorum omnium testimonium stabile et perpetuum tam nos quam capitulum nostrum presens scriptum sigillorum nostrorum appositione et manuum nostrarum subscriptione corroboravimus Actum apud Glasgw anno gratie MCCXXXIX die Sabbati proxima post nativitatem beate Marie Virginis