Charter Document - 06190273

Honorius episcopus servus servorum Dei dilectis filiis Abbati et conventui Cluniacensi salutem et apostolicam benedictionem Religionis vestre in qua de die in diem laudabiliter Domino cooperante proficitis meretur honestas ut vestris petitionibus a sede apostolica favorabiliter annuatur et illis precipue que sic pulsant cum moderamine animum preminentis quod intra exauditionis januam meretur admitti Vestra sane petitio nobis exhibita continebat quod cum monasterium vestrum quod ejusdem sedis specialiter juris existit a primo sue fundationis exordio usque ad moderna tempora multis et diversis Romanorum pontificum privilegiis et indulgentiis sit munitum et dotatum libertatibus ab eisdem nonnulli archiepiscopi et episcopi et officiales eorum aliique ecclesiarum prelati non attendentes quod vobis principaliter injuriari probantur qui privilegia sedis apostolice vel irreverenter impugnant vel superficialiter eorum verba tenentes contra ipsorum gestiunt intellectum et privilegiatos privilegiorum commodis privare conatur contra eadem privilegia et indulgentias ad synodos et conventus forenses vos ire compellunt ad domos vestras causa ordines celebrandi causas tractandi aliquas conventus publicos convocandi et missa celebrandi interdum accedunt ab Abbate vel priore vestri monasterii nullatenus invitati a fratribus etiam Cluniacensis ordinis obedientiam et reverentiam exigere vel extorquere ac in ipsos ubi libet commorantes jurisdictionem exercere interdicti et excommunicationis sententias perferre in prioratibus et cellis ejusdem ordinis que nunc sine abbate Cluniacensi monasterio sunt subjecti abbates ordinare infra parochias locorum eidem monasterio sub dictorum absque Cluniacensis Abbatis assensu ecclesias et capellas construere cimiteria benedicere de vestris monachis et monasteriis judicare ad judicia sua eos invitos protrahere ac pro controversiis vestris in parochianos homines et servientes vestros animadvertere presumentes quanquam archiepiscopi et episcopi in quorum dioecesibus facultates vestre consistunt si contra eadem monasteria vel monachos ipsos aliquid questionis habuerunt te fili Abbas tuosque successores ex indulto sedis apostolice debeant appellare ac si lis per vos diffiniri nequierit ad eandem sedem referri ejus solius judicio terminanda Cum autem sit a predicta sede statutum ut omnes ecclesie capelle et cimiteria vestra libera et immunia ab omni exactione consistant et fratres cellarum seu locorum vestrorum ubi libet positorum pro interdicto et excommunicatione quibuslibet suspensione divinorum officiorum minime patiantur et tam monachi predictorum locorum quam eorum famuli et qui se monastice professioni devoverint divine servituti officia celebrent et debita peragant sepulture Iidem Prelati vos uti libere statutis hujusmodi non permittant nec dioecesani episcopi aut officiales eorum presentatos sibi a vobis ad parochiales ecclesias quas habetis sacerdotes admittunt nec celebrare in eis divina officia patiuntur eosdem prout vobis est ex apostolice sedis benignitate concessum si dicti episcopi vel officiales presentatos eosdem malitiose non duxerint admittendos Preterea cum ex indulgentia sedis ejusdem ecclesiarum vestrarum decimas que a laycis detinentur si secundum Deum ab eorum potestate subtrahere vestre religionis reverentia poterit ad vestram et pauperum gubernationem vobis et ordini vestro liceat retinere ac laicos vel clericos seculares per loca vestra ad conversionem sive ad sepulturam suscipere nisi pro certis criminibus fuerint excommunicationis sententia innodati iidem super hiis vobis temere se opponunt alium quam Cluniacensem ordinem in parochiis ad jus vestrum spectantibus de novo creare nihilominus presumentes licet ab eadem sede id fieri cuilibet inhibitum sit expresse Ad hec cum vos et fratres vestri ubi libet commorantes conveniri vel ultra duas dictas a monasteriis vestris ad judicium pertrahi seu ad cujuslibet provisionem compelli per litteras apostolicas non possitis nec alicui liceat auctoritate ipsarum in fratres ipsos jurisdictionem aliquam exercere nisi eedem littere plenam de ordine vestro et indulgentia vobis super hiis ab eadem sede concessa fecerint mentionem ipsi prelati et alii a sede apostolica delegati indulgentiam hujusmodi voluntate propria non servantes super hiis vos sepius aggravant et perturbant Audivimus preterea quod non mediocriter movet nos nec modicum derogat libertati quod aliqui prelati ecclesiarum et officiales eorum licet in vos et alios ordinis Cluniacensis monachos vel conversos ubi libet commorantes pro eo quod estis Apostolice sedis privilegiis et indulgentiis communiti eis non liceat excommunicationis aut interdicti sententiam promulgare in molentes tamen in molendinis et coquentes in furnis in contrahentes vobiscum quibuscunque contractibus in servientes et familias vestras in locantes eis operas suas in illos etiam qui missas et horas vestras audiunt decimas redditus et oblationes ac alia vobis debita reddunt seu alias vobis communicant et excommunicationis et interdicti sententias fulminare ac concessiones tam ab eorum predecessoribus quam aliis Christi fidelibus liberalitate pia et provida ordini vestro factas revocare voluntate propria ne dicamus potius temeritate presumunt bona que in eorum continentur dioecesibus attestari vel detineri tamdiu per violentiam facientes donec super hiis eorum voluntati fuerit satisfactum alias vobis gravamina et injurias multipliciter inferendo sicque sit ut exemptio concessa vobis causa solatii et quietis pariat vobis dispendium et laborem quare nobis humiliter supplicastis ut tantis vestris gravaminibus et jacturis providere misericorditer curaremus Nos itaque ad instar felicis recordationis Alexandri iiii Clementis iiii Urbani iiii et Nicholaii tertii predecessorum nostrorum Romanorum pontificum nolentes de cetero tam abusivas enormitates seu tam enormes abusus non absque apostolice sedis excogitatos injuria sustinere hujusmodi excommunicationis et interdicti sententias et alia supradicta contra ejusdem sedis indulta in vestrum prejudicium fieri auctoritate presentium districtius inhibemus decernentes irritum et inane si quid contra inhibitionem hujusmodi super premissis fuerit attemptatum Nulli ergo omnino hominum liceat hanc paginam nostre inhibitionis et constitutionis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Rome apud Sanctam Sabinam Nonis Maii pontificatus nostri anno primo