Charter Document - 06190240

Clemens episcopus servus servorum Dei dilectis filiis Abbati et conventui monasterii de Passelet ordinis Cluniacensis dioecesis Glasgwensis salutem et apostolicam benedictionem Vobis ad hoc sollicitis ut eterno regi per religiose vite studium placeatis libenti animo illa concedimus que dinoscuntur fore vobis et vestro monasterio profutura Sane petitio vestra nobis exhibita continebat quod bone memorie Walterus Glasgwensis episcopus capituli sui ad id accedente consensu ecclesiam de Cragyn Glasgwensis dioecesis in qua jus patronatus habetis vobis in proprios usus [deputavit] ita quod predictam ecclesiam cum eam vacare contingeret possetis usibus hujusmodi applicare portione congrua vicario perpetuo in eadem ecclesia servituro de ipsius proventibus reservata prout in litteris dictorum Episcopi et capituli confectis exinde dicitur plenius contineri Postmodum vero Johanne rectore ipsius ecclesie viam universe carnis ingresso quondam Willelmus predecessor tuus fili Abbas et vos filii conventus ad eandem ecclesiam magistrum Willelmum de Bosco clericum bone memorie Willelmo Glasgwensi episcopo prefati Walteri successori in lesionem predicti monasterii presentastis quem idem Willelmus episcopus in rectorem instituit in eadem reservata tamen vobis de dicte ecclesie proventibus quadam annua pensione quam ab eodem clerico qui eandem ecclesiam adhuc detinet percepistis Quare fuit ex parte vestra nobis humiliter supplicatum ut ne per hoc post prefati clerici obitum possit vobis seu dicto monasterio parari nocumentum aliquod vel prejudicium generari providere in hac parte vobis paterna diligentia curaremus Nos igitur vestris supplicationibus inclinati auctoritate vobis presentium indulgemus ut per presentationem institutionem dicti Rectoris ac detentionem hujusmodi nullum vobis prejudicium generetur quominus eandem ecclesiam cedente vel decedente dicto clerico in proprios usus juxta concessionem nominati Walteri episcopi de ipsa ecclesia ut predicitur vobis factam convertere ipsiusque possessionem ingredi dioecesani loci vel cujusvis alterius irrequisito assensu [adeo] libere ac si dicte presentatio et institutio nullatenus facte fuissent de memorato clerico valeatis reservata perpetuo vicario ecclesie predicte de proventibus ejus congrua portione de qua possit commode sustentari et incumbentia sibi onera supportare Nulli ergo omnino hominum liceat hanc paginam nostre concessionis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum Datum Perusii iiii Nonas Aprilis pontificatus nostri anno secundo