Charter Document - 06190187

Omnibus Christi fidelibus presens scriptum visuris vel audituris Johannes dominus de Wardroba Bernardus de Erth et Norinus de Monorgund salutem in Domino sempiternam Noverit universitas vestra quod lis inter nos ac Mariam Helenam et Forveleth sponsas ex parte una et Abbatem et conventum de Passelet ex altera aliquamdiu in curia Malcolmi comitis de Levenax agitata super terris de Cocmanach Fimbalach Edynbernan Backan ac Druncreue in hunc modum quievit videlicet quod nos pro nobis et predictis sponsis nostris ac heredibus nostris predicte liti totaliter et integre renunciavimus inperpetuum propter centum et quadraginta marcas quas dicti Abbas et conventus nobis solvent pro bono pacis ad terminos subscriptos videlicet viginti libras infra octavas Sancti Martini anni gratie millesimi ducentesimi septuagesimi et quinquaginta quinque marcas infra nundinas Glasgwenses anni gratie millesimi ducentesimi septuagesimi primi et quinquaginta quinque marcas infra octavas Sancti Martini anni ejusdem Et nos predictis Abbati et conventui omnem renunciationem quietam clamationem et securitatem quas sibi super terris premissis poterunt et sciverint ordinare vel providere pro nobis et predictis uxoribus et heredibus nostris presentibus et futuris quandocunque voluerint faciemus prout melius sibi viderint expedire Et ante primam solutionem dicte pecunie termino statuto nobis faciendam in curia predicti Comitis de Levenax omni juri quod nobis sponsis nostris predictis et heredibus nostris in predictis terris competit vel competere poterit aliquo jure vel judicio inperpetuum renunciabimus et predictas terras predictis Abbati et conventui quietas clamabimus sub pena centum librarum incontinenti solvendarum medietatem fabrice ecclesie Glasgwensis medietatem fabrice ecclesie de Passelet si contra hanc conventionem nos vel sponse nostre predicte seu heredes nostri vel aliquis nostrum contradicere vel reclamare voluerimus vel voluerit presenti scripto nihilominus in suo robore permanente Et ad hanc conventionem in quolibet articulo fideliter observandam pro nobis et predictis sponsis nostris et heredibus nostris sacramentum prestitimus corporale et subjecimus nos jurisdictioni et coertioni domini Electi Glasgwensis et Decani cathedralis ejusdem loci ut ambo vel alter possint vel possit nos omnes et singulos tam ad solutionem pene si committatur quam ad observationem hujus conventionis in quolibet articulo per omnimodam censuram ecclesiasticam compellere nullo juris beneficio canonici vel civilis generalis vel specialis nobis vel alicui nostrum contra hanc conventionem reclamare volentibus vel volenti valituro In cujus rei testimonium presens scriptum appositione sigillorum nostrorum roboravimus Hiis testibus domino Roberto vicario de Innerkyp domino Johanne capellano de Passelet domino Willelmo de Swynford sacrista ecclesie Glasgwensis domino Lamberto clerico rectore ecclesie de Dunhoven domino Henrico de Irwyn clerico Thoma de Polloc Johanne de Knoc Fynlaio de Clochotrich clerico Johanne filio Alani et aliis Datum apud Passelet die dominica proxima post festum Sancti Dyonisii anni gratie millesimi ducentesimi septuagesimi