Charter Document - 06190170

Intentio Abbatis et conventus de Passelet est probare quod tota illa terra de Monachkennaran super amnem de Clud injuste in Gilbertum filium Samuelis alienata est quia de jure ad ecclesiam eorum de Kylpatrik debet pertinere unde petunt ipsum Gilbertum a dicta terra amoveri et eandem terram ad jus et proprietatem dicte ecclesie legitime revocari Prima productio testium per Abbatem et conventum contra dictum Gilbertum die lune proxima ante festum Sancti Mathei in parochiali ecclesia de Yrewin anno gratie millesimo ducentesimo tricesimo tertio Alexander filius Hugonis juratus dicit quod sexaginta annis et eo amplius elapsis vidit quendam nomine Bede Ferdan habitantem in quadam domo magna fabricata de virgis juxta ecclesiam de Kylpatrik versus Orientem et tenuit illam terram de Monachkennaran quam Gilbertus filius Samuelis nunc tenet Interrogatus cujus nomine dictam terram possedit dicit quod tantum nomine ecclesie nullum aliud servitium faciendo pro dicta terra nisi tantummodo recipiendo et pascendo hospites illic venientes Dicit etiam quod cum puer esset aliquando receptus est ibi cum patre suo sicut hospes et quod dictus Beda eodem jure et servitio tenuit terram de Cultbuthe et de Dumtechglunan Thomas Gaskel juratus dicit quod vidit dictum Bedam Ferdan manentem in eadem domo in terra ecclesie Sancti Patricii sita tenentem easdem terras eodem modo eodem jure et idem servitium faciendo sicut Alexander testatus est addidit etiam quod vidit postmodum Cristinum filium dicti Bede possidentem easdem terras eodem jure quo pater ejus possidebat et quod totalis terra ecclesie divisa erat in quatuor partes quarum unam partem dictus Beda Ferdan possedit et tres alii tres alias partes quorum quilibet nomine ecclesie respondebat hospitibus inter se divisis Requisitus de tempore dicit quod plusquam quadraginta anni elapsi sunt quia ibidem nutritus est ab infantia Interrogatus que alie terre pertinent ad ecclesiam dicet quod Cochmanach Fimbelach Edinbernan et Craguentalach et quadam alie terre quas Dufgallus filius Comitis nunc tenet Dufgallus filius Comitis juratus dicit idem per omnia quod Thomas Gaskel et adjecit quod dicta terra de Monachkennaran et plures alie terre per defectum et negligentiam ipsius a dicta ecclesia fuerunt alienate quia noluit patrem vel fratrem suum vel parentes suos offendere Secunda productio testium per Abbatem et Conventum de Passelet contra dictum Gilbertum filium Samuelis die sabbati proxima post festum Sancti Martini in parochiali ecclesia de Are anno supradicto Malcolmus Beg juratus dicit quod vidit Bedam Ferdan habentem domum suam sitam juxta cimiterium ecclesie de Kylpatrik ex orientali parte et tenuit nomine ecclesie illam terram de Monachkennaran quam Gilbertus filius Samuelis modo tenet et pro dicta terra et aliis quas tenebat de ecclesia recipiebat hospites ad ecclesiam venientes nullum aliud servitium faciendo pro eis Requisitus in tempore cujus Comitis hoc vidit dicit quod in tempore Alwirti comitis et quod idem Comes dedit Sancto Patricio et ecclesie illam terram de Kachconnen quam ipse Malcolmus postea tenuit et vendidit per timore et dicit quod omnes terre ecclesie quas dictus Beda tenuit et quas Dufgallus et alii modo tenent libere et quiete erant ab omni temporali servitio et quod homines in illis terris manentes et habitantes defensi erant semper per ecclesiam et in curia ecclesie contra omnes Anekol juratus idem dicit per omnia quod Malcolmus Beg et adjecit quod comes Dauid frater regis Willelmi eo tempore quo habuit comitatum de Levenax et possedit voluit de dictis terris ecclesie de Kylpatrik habere auxilium sicut de ceteris terris comitatus et non potuit quia defense erant per ecclesiam Gilon juratus idem dicet per omnia quod Malcolmus Beg Gilbethoc juratus concordat in omnibus cum Malcolmo et Anecol et adjecit quod dictus Beda interfectus erat pro jure et libertate ecclesie Fergus filius Cunigham juratus concordat cum Gilbethoc in omnibus Hilarius juratus dicit idem per omnia quod Fergus et Gilbethoc Nemias juratus idem dicit per omnia quod Anecol et adjecit de tempore quod quinquaginta anni et eo amplius elapsi sunt postquam hoc vidit et pro certo habet quicquid dicit quia natus fuit in illa parochia Reffin juratus idem dicit per omnia quod Nemias Gillemor juratus idem dicit per omnia quod Reffin et Nemias Rotheric Beg de Carric juratus concordat in omnibus cum Malcolmo Beg fratre ipsius Requisitus qualiter hoc scivit dixit quod hoc vidit ab adolescentia sua quia natus et nutritus erat in parochia de Kylpatrik Rathel juratus concordat in omnibus cum predicto Rotheric Gillekonel Manthac frater comitis de Carric juratus dicit idem per omnia quod Malcolmus Beg