Charter Document - 06190169

Sciant presentes et futuri quod cum ex delegatione apostolica coram de Carric et de Cunigham Decanis et Magistro scolarum de Are causa mota fuisset inter Abbatem et conventum de Passelet ex parte una et Dufgallum rectorem ecclesie eorum de Kylpatrik ex altera super terris de Dalleuenach de Cochmanach de Edinbernan de Baccan de Fimbelach de Drumcreue de Losset et de Craguentalach ad ecclesiam dictam de jure spectantibus quas idem Dufgallus sicut ipsi dicebant contra salutem propriam et fidelitatem dicte ecclesie debitam nitebatur hereditarie possidere per quasdam cartas adulterinas et illicite adquisitas ob quam causam petierunt dictum Dufgallum a dicta ecclesia juste amoveri et predictas terras ad jus et proprietatem ejusdem ecclesie legitime revocari tandem partibus in presentia dictorum judicum constitutis cum idem Dufgallus contendere non auderet timens sibi periculum imminere si premissa probata fuissent contra ipsum misericordiam postulavit non judicium resignans sollempniter omnes predictas terras in manus Abbatis dicti monasterii pro se et conventu suo in dicta causa procuratoris constituti concedens ut ab illa hora inantea omnes carte que de dictis terris hereditarie possidendis fecerint mentionem penitus sint cassate et nulli hominum valiture Dictus igitur Abbas de consilio judicum ei fecit misericordiam quam petebat ex toto renuntians liti mote contra ipsum et dictam ecclesiam de Kylpatrik ei concedens cum illa dimidia carucata terre de Cochmanach absque inquietatione in vita sua tenenda Acta in parochiali ecclesia de Are die sabbati proxima post dominicam qua cantatur Quasi modo geniti anno gratie millesimo ducentesimo tricesimo quarto predictis judicibus omnia que super premissis facta sunt inter partes approbantibus et auctoritate apostolica confirmantibus huic etiam scripto in modum chyrographi confecto sigillis partium alternatim appositis gratia testimonii