Charter Document - 06190148

Omnibus Christi fidelibus ad quos presens scriptum pervenerit magister Robertus de Lanarc subdecanus ecclesie Glasguensis et Robertus de Edynburg ejusdem ecclesie canonicus gerentes vices domini Abbatis de Kylwynyn judicis a domino Papa delegati in causa que vertebatur inter dominos Abbatem et conventum de Passelet ex parte una et Malmorem dictum Hobolan perpetuum vicarium de Kyllinan ex altera salutem in Domino sempiternam Noverit universitas vestra quod cum dominus Ysaac monachus de Passelet procurator predictorum Abbatis et conventus proposuisset coram nobis in judicio quod predictus Malmor vicarius injuste et sine cause cognitione spoliaverat predictos Abbatem et conventum nummata terre de Kylmor apud Kenlouchgilp et capella beate Marie in eadem terra fundata in cujus erant possessione pacifica percipiendo firmam predicte nummata terre per aliquod tempus prenominatus Vicarius de jure suo dissidens in judicio coram nobis confessus fuit se dictos Abbatem et conventum predicta nummata terre cum capella indebite spoliasse unde cum nobis plene constaret in judicio de jure predictorum Abbatis ei conventus tum per consessionem predicti Vicarii tum per legitima instrumenta prenominatum procuratorem nomine dictorum Abbatis et conventus ad possessionem dicte nummata terre et capelle cum omnibus pertinentiis suis sententialiter decrevimus et duximus restituendum ac in possessionem mittendum et dictus Vicarius omni juri quod in dicta terra et capella cum omnibus pertinentiis suis habuit vel habere potuit coram nobis in manibus predicti procuratoris nomine predictorum Abbatis et conventus pro se et suis sollempni assensu et spontanea voluntate renuntiavit et concessit quod si aliquo tempore aliquod instrumentum repertum esset quod de predicta terra nomine suo faceret mentionem irritum esset et inane nec sibi seu alicui alio aliquo tempore valiturum Predicti Abbas et conventus ad instantiam nostram predicto Vicario misericordiam facientes concesserunt eidem predictam nummatam terre cum omnibus pertinentiis suis ad firmam in tota vita sua tenendam Solvendo singulis annis eisdem in monasterio de Passelet infra octo dies nundinarum Glasguensium dimidiam marcam argenti bonorum et legalium sterlingorum omni casu contingente Et renuntiavit predictus Vicarius pro se et suis omni juris beneficio canonici et civilis et omnibus litteris a quocunque foro impetratis et impetrandis et privilegiis cruce signatis et cruce signandis concessis seu concedendis et specialiter beneficio restitutionis in integrum et reservata nobis potestate judiciaria nobis commissa subjecit se jurisdictioni et potestati nostre ut ambo vel alter nostrum ipsum ad observationem omnium premissorum si aliquo tempore contra hec vel aliquod premissorum per se vel alium venire voluerit seu predictis Abbati et conventui judicio possessorio vel petitorio super premissis movere questionem per censuram ecclesiasticam de plano et absque strepitu judicii monitione premissa possint vel possit compellere In cujus rei testimonium presens scriptum sigillis nostris una cum sigillo predicti Vicarii fecimus roborari Datum apud Glasgu die lune proxima ante festum Sancti Johannis Baptiste anno gratie millesimo ducentesimo sexagesimo octavo Hiis testibus Willelmo de Cadiou Edgero vicario de Glasgu Willelmo de Cunigam capellano Petro capellano Waltero Marschall Willelmo de Fyf et aliis multis