Charter Document - 06190136
| Charter Number: | 06190136 |
|---|---|
| Cartulary Title: | Registrum Monasterii de Passalet |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1262 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Omnibus Cristi fidelibus hoc scriptum visuris vel audituris Alanus Dei gratia episcopus Ergadiensis salutem in Domino Sciatis quod cum Malcolmus rector ecclesie Sancti Querani in Kentyir quam nobilis vir dominus Engus filius Dovenaldi ejusdem ecclesie verus patronus monasterio de Passelet et monachis ibidem Deo servientibus et perpetualiter servituris contulit intuitu caritatis de consensu et voluntate ejusdem nobilis viri in tempore predecessoris nostri se obligasset ad solvendum annuatim de predicta ecclesia predicto monasterio pensionem unius ponderis ferri quod petra vulgariter appellatur nec tamen plenaria persolvisset propter quod in causam trahebatur coram judicibus delegatis postmodum sue inobedentie et inconstantie penitens de predicte pensionis solutione minus completa humiliter satisfecit ac prestito corporali super sacrosanctis evangeliis sacramento se nostre ordinationi super annua pensione predicto monasterio solvenda necnon Abbas et conventus ejusdem loci subposuerunt Nos vero quia dictus Malcolmus primam quam promiserat pensionem sicut debuit non persolvit ita duximus ordinandum scilicet quod idem Malcolmus monasterio de Passelet de predicta ecclesia sua unam libram cere vel sex denarios annuatim persolvet apud Passelet infra tempus nundinarum de Glasgu nomine pensionis et quod ab omni actione et lite mota et que posset moveri per Abbatem et conventum de Passelet dictus Malcolmus usque ad diem hujus ordinationis ratione pensionis minime persolute remaneat penitus absolutus In cujus ordinationis testimonium presens scriptum sigilli nostri munimine fecimus roborari Datum apud Ar die purificationis Beate Marie anno gratie millesimo ducentesimo sexagesimo primo In cujus rei testimonium presens scriptum sigillis nostris una cum sigillo officialitas curie Glasguensis gratia majoris testimonii fecimus roborari
Source (click image below to view full size)
