Charter Document - 06190130
| Charter Number: | 06190130 |
|---|---|
| Cartulary Title: | Registrum Monasterii de Passalet |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1192 - 1207 |
| Date type: | Assigned |
| Resource Link(s): |
People of Medieval Scotland |
Charter:
Sciant omnes tam presentes quam futuri quod ego Reginaldus filius Sumerled dominus de Inchegal factus sum frater et uxor mea Sonie soror in capitulo domus de Passelet et in toto ordine Cluniacensi et ego verus frater et bonus amicus predictis monachis fratribus meis de Passelet inperpetuum mansurus cum heredibus meis et hominibus meis testimonio sigilli mei concessi eis me daturum sibi pro salute mea et uxoris mee et heredum meorum et hominum in hoc anno octo boves et duos denarios ex qualibet domo unde sumus exit et post hunc annum singulis annis unum denarium ex qualibet domo totius terre mee unde sumus exit dabo illis et post me heredes mei dabunt aut maledictionem meam habebunt nisi promptissime dederint Preterea uxor mea Sonia concessit eis se daturam illis in elemosinam decimam omnium rerum que sibi Deus dederit scilicet tam ex ipsis que apud se retinere voluerit quam ex illis que per terram vel per mare ad vendendum inperpetuum miserit Et quia ego et heredes mei participes sumus et inperpetuum erimus omnium bonorum que in domo de Passelet et in toto ordine fiunt vel inperpetuum fient tam in orationibus quam in ceteris divine servitutis obsequiis dedi eis et concessi et hoc presenti scripto auctoritate sigilli mei roborato confirmavi firmam pacem meam et omnium heredum meorum et hominum cum manu tenemento bone fraternitatis ubicumque ipsi vel homines eorum fuerint aut venerint in terra vel in mari supplicans amicis meis et precipiens omnibus hominibus meis ut ubicumque invenerint predictos monachos fratres meos aut eorum homines ipsos manu teneant et in suis auxilientur negotiis scientes pro certo quod per Sanctum Columbam si aliquis heredum meorum eis malefecerit maledictionem meam habebit vel si quid mali forte ab hominibus meis vel ab aliis de quibus eos vindicare potero sibi vel suis factum fuerit mortis pena punientur Hiis testibus Ameleo filio Gillecolmi Gillecolmo filio Gilmihel Mauricio capellano meo et multis aliis ibi tunc presentibus
Source (click image below to view full size)
