Charter Document - 06190057

Hec est conventio facta inter Abbatem et conventum de Passelet ex parte una et Johannem de Aldhus filium Rogerii de Aldhus ex altera die Martis proxima ante festum Sancti Nicholai episcopi anno gratie millesimo ducentesimo octogesimo quarto videlicet quod predictus Johannes eodem die apud Glasgu in plena curia coram domino Willelmo de Soulys tunc justitiario Laudonie et aliis magnatibus pro se et heredibus suis dedit concessit et quietum clamavit predictis Abbati et conventui totum jus quod habet vel aliquo tempore habuit vel habere potuit in terra de Aldhus et predicti Abbas et conventus de communi consensu et assensu capituli sui concesserunt et presenti scripto suo ad firmam dederunt predicto Johanni illam portionem terre in territorio de Aldhus quam Patricius filius Neuyn quondam de predictis monachis tenuit ad firmam Tenendam et habendam predicto Johanni toto tempore vite sue quiete et pacifice cum bracina et aliis pertinentiis suis propter sex solidos et octo denarios bonorum et legalium sterlingorum eis singulis annis apud Passelet solvendos ad duos anni terminos videlicet medietatem ad Pentecosten et medietatem ad festum Sancti Martini in hyeme sine fraude seu prorogatione termini longioris Insuper concesserunt et presenti scripto confirmaverunt quod si de predicto Johanne ante decessum Cristiane sponse sue contingat humanitus quod predicta Cristiana prenominatam portionem terre cum pertinentiis habeat et teneat toto tempore vite sue solvendo predictis religiosis annuatim pro predicta terra tres decem solidos et quatuor denarios bonorum et legalium sterlingorum apud Passelet ad terminos prescriptos Et predictus Johannes seu prenominata Cristiana sponsa sua non habebunt potestatem pro tempore suo prenominatam portionem terre vel aliquam partem ejusdem alicui persone ad firmam dare impignorare vel aliquo titulo alienationis alienare per quod predictis religiosis dampnum gravamen prejudicium vel perturbatio possit generari Et sciendum est quod predicta portio terre cum pertinentiis post decessum eorum ad predictos religiosos et monasterium eorum libere et sine omni perturbatione seu gravamine revertetur nullo proponendo obstante vel valituro In cujus rei testimonium presens scriptum in modum cirograffi est confectum cujus parti penes predictos Johannem et Cristinam sponsam suam remanenti appensum est commune sigillum capituli de Passelet et altera pars que penes predictos Abbatem et conventum remanet sigillis domini Jacobi senescalli Scotie domini Walteri de Lyndesay domini Reginaldi de Crauford et domini Simonis Flandrens una cum sigillo officialitas curie Glasguensis et sigillo predicti Johannis de Aldhus est roborata Hiis testibus domino Willelmo de Soulys justitiario Laudonie domino Simone Fricheel domino Johanne Soulys domino Herberto de Maxwel domino Radulfo Heclin Gilberto de Cunigysburg Arthuro de Dunhou Johanne de Knoc Thoma de Fulton et aliis multis