Charter Document - 06190047

Omnibus Christi fidelibus presens scriptum visuris vel audituris magister Antonius Fisic salutem Noverit universitas vestra dominum Abbatem et conventum de Passelet ad instantiam et petitionem domini mei Alani senescalli Scotie concessisse et ad firmam dedisse michi fideli et jurato eorum totam terram de Fulton per omnes divisas per quas Thomas filius Nicholai et pater ejus eandem terram prius de dictis Abbate et conventu ad firmam tenuerunt Salvis dicto Thome terminis suis ejusdem terre pro sex decem marcis argenti de annuo redditu illarum viginti marcarum quas michi ad preces et supplicationem predicti domini mei Alani senescalli in tota vita mea de camera sua prius contulerunt Tenendam et habendam michi in tota vita mea libere quiete plenaria et honorifice cum omnibus libertatibus aisiamentis et justis pertinentiis sine omni onere et seculari demanda et sequela curie Salvis predictis Abbati et conventui in curia sua predicte terre placitis vite et membrorum cum escaetis suis et salvis eisdem omnimodis decimis totius terre ejusdem Solvendo apud Passelet in meo perpetuo per me vel actornatum meum dictis Abbati et conventui singulis annis infra [tempus] nundinarum Glasguensium unam libram piperis vel sex denarios nomine firme predicte terre Et si forte per dictos Abbatem et conventum alia pars terre de Fulton ad valentiam quatuor marcarum vel amplius fuerit perquisita per metas et divisas in carta domini Henrici de Sancto Martino contentas totam terram perquisitam cum omnibus utilitatibus fructibus libertatibus pertinentiis et aisiamentis in manu sua per biennium vel triennium pro voluntate sua tanquam veri domini et justi possessores libere et pacifice tenebunt ita quod postmodum predictam terram michi firmario suo pro solutione quatuor marcarum residuarum de suprascriptis viginti marcis assignabunt in meo perpetuo tenendam sine aliquo prejudicio exheredationis sue Unde volo et bona fide concedo ut tota terra prescripta tam per eos adquisita quam prius ab eis obtenta et possessa post decessum meum incontinenti ad predictos Abbatem et conventum revertatur hereditarie sine omni calumpnia gravamine molestia et contradictione ex parte mea vel alicujus de meis ita quod nemo ex parte mea aliquid juris hereditarie in predicta terra post decessum meum aliquo jure judicio vel casu contingentibus exigere possit vel clamare Nec ego Antonius habeo vel habebo nec aliquis nomine meo habebit potestatem vel auctoritatem obligare vel impignorare vel ad firmam dare predictam terram in parte vel in toto alicui persone seculari vel ecclesiastice potentiori vel ditiori annuo redditu viginti marcarum et hoc alicui manenti in baronia de Renfru sine consensu et assensu capituli sui renuncians expresse tam per me quam pro me in hoc facto omni cavillationi contradictioni appellationi privilegio fori regie prohibitioni et omnibus legibus et consuetudinibus regni statutis vel statuendis et omnibus gratiis indulgentiis privilegiis litteris generalibus vel specialibus a sede apostolica vel ab aliquo gerente vices ipsius concessis vel concedendis et omnibus aliis que dictis Abbati et conventui prejudicare possint vel obesse contra tenorem carte sue de predicta terra michi confecte Et ad majorem hujus rei securitatem subjeci me jurisdictioni domini mei Alani senescalli Scotie et domini decani Glasguensis qui pro tempore fuerit ut ambo vel alter eorum si ambo non supersint possint vel possit me compellere ad observationem omnium premissorum modis omnibus et cohibiti omnibus quibus melius viderint vel viderit expedire In hujus rei testimonium dominus meus Alanus senescallus auctoritatem consensum et assensum ad hec omnia facienda prestans a me requisitus sigillum suum una cum sigillo meo huic scripto apposuit Hiis testibus domino David de Lindsay Nicholaio de Sullis Thoma de Bessat Gwydo de Normanwill militibus dominis Simone et Roberto capellanis Willelmo et Johanne clericis et multis aliis