Charter Document - 06190038

Universis ad quorum notitiam presentes littere pervenerint Johannes regis Scotie primogenitus comes de Carric et senescallus Scotie Willelmus comes de Douglas Hugo de Eglynton Alanus Senescallus milites Johannes de Carric canonicus Glasguensis cancellarius Scotie magister Willelmus de Dalgarnoc canonicis de Dunkeld Adam Forest aldermannus de Edynburgh et Alanus de Lawedre salutem In Domino sempiternam Cum nuper super questione seu controversia mota inter dominum Willelmum More militem nomine et ex parte Magistri et monialium domus de Simpringham ex parte una et religiosos viros Abbatem et conventum monasterii de Passelet ordinis Cluniacensis ex altera super petitione annue pensionis quadraginta marcarum sterlingorum prefato domino Willelmo More nomine quo supra debite ut asseruit per prefatos Abbatem et conventum de Passeleto post nonnullas lites controversias et altercationes tam in Romana curia quam in partibus hinc inde agitatas et habitas compromissum fuisset finaliter in nos tanquam in compositores amicabiles per partes predictas Nos attentis et consideratis laboribus et expensis ac dampnis quas et que hactenus utraque predictarum partium fecit et sustinuit occasione litis sive controversie predicte et quas et que ipsarum quamlibet oportebit sustinere et facere si lis super hoc continuata fuerit ulterius inter partes onus compromissi hujusmodi in nos ad instantiam earundem partium assumentes recepta ab utraque parte prius juratoria cautione quod earum quelibet stabit ordinationi diffinitioni et determinationi nostre in hac parte quodque ipsas ordinationem diffinitionem et determinationem ratas et firmas habebit perpetuo visis lectis et diligenter examinatis litteris evidentiis et instrumentis per utramque partem coram nobis exhibitis et productis ac auditis rationibus hinc inde tam scripto quam verbo propositis deindeque intra nos sollicito et diligenti tractatu sive deliberatione prehibito in ipso compromissi negotio juxta formam nobis traditam procedentes ordinavimus diffinivimus et pronuntiavimus quod lis sive controversia predicta omnino quiescat ac sopita sit penitus et extincta sub modis forma et conditionibus infrascriptis Et primo quod terre de Sanchare infra vicecomitatum de Are que fuerunt dicti domini Willelmi More ad manus et proprios usus dictorum religiosorum applicate pretextu et virtute cujusdam obligatorii sigillo quondam Reginaldi More patris ejusdem domini Willelmi More sigillati et coram nobis inter alia ibidem exhibiti ac postmodum nobis Johanni comiti de Carric predicto de consensu domini patris nostri Regis Scotie tunc senescalli Scotie donate et concesse per cartam eorundem religiosorum virorum et in manu nostra per dies et annos existentes reddantur et restituantur predicto domino Willelmo More tenendum habendum et possidendum sibi et heredibus suis adeo libere sicut ante applicationem donationem et concessionem de ipsis sibi factas ipsas terras liberius juste tenuit seu possedit quodque per nos Comitem predictum et auctoritate nostra in possessionem seu saysinam earundem mittatur ac mitti debeat sicut prius Item quod dictus dominus Willelmus More ante primam solutionem sibi faciendam de summa pecunie subscripta omnes literas cartas et evidentias ac instrumenta tam publica quam privata per quas et que ipsam annuam pensionem quadraginta marcarum nomine quo supra petiit seu petere aut habere nitebatur seu debuit sursum reddat ac ipsis et eorum singulis ac omni juri sibi et heredibus suis aut dictis Magistro et monialibus in ipsa annua pensione quadraginta marcarum competenti seu debito seu quod sibi aut eis competere potuit aut poterit in futurum eisdem Abbati et conventui de Passeleto omnino ac perpetuo renunciet pro se et heredibus suis ac pro Magistro et monialibus supradictis Item ordinatum fuit et diffinitum et pronuntiatum per nos compositores amicabiles predictos quod prefatus dominus Willelmus More ad reddendum prefatos religiosos viros perpetuo indempnes a petitione dictorum Magistri et monialium domus de Simpringham quo ad annuam pensionem predictam ipsos religiosos Abbatem et conventum de Passelet habere faciet omnes litteras evidentias et instrumenta que in hac parte necessaria fuerint ad enervationem et annullationem juris et petitionis predictorum Magistri et monialium in hac parte Item ordinatum fuit et diffinitum ac pronuntiatum per nos compositores amicabiles predictos quod prefati religiosi Abbas et conventus de Passelet ad redimendum labores et vexationes ipsorum et etiam jus quod asseruit dictus dominus Willelmus More se habuisse ad annuam pensionem quadraginta marcarum predictam solvant eidem domino Willelmo More heredibus vel assignatis suis apud monasterium de Passelet trecentas marcas sterlingorum ad terminos infrascriptos videlicet centum marcas sterlingorum ad festum Pentecostes proxime futurum centum marcas sterlingorum ad festum Sancti Martini immediate sequens et centum marcas sterlingorum ad festum Pentecostes anno Domini millesimo trecentesimo septuagesimo quarto Item ordinatum fuit et diffinitum ac pronuntiatum quod si alique littere instrumenta vel carte aut alique alie evidentie quecunque penes aliquam partium predictarum aut penes Magistrum et moniales predictos aut alios quoscunque reperte seu reperta fuerint de cetero continentes seu continentia prefatam annuam pensionem quadraginta marcarum apud aliquam partium predictarum ipse littere carte instrumenta et evidentie sint perpetuo casse nulle et irrite cassa nulla et irrita nullamque optineant perpetuo roboris firmitatem Et in premissorum omnium testimonium ac ad perpetuam memoriam futurorum nos prefati compositores amicabiles presenti scripto sive instrumento nostra fecimus apponi sigilla et nihilominus prefati Abbas et conventus ac prefatus dominus Willelmus More in signum et testimonium utriusque partis consensus sigilla sua apposuerunt etiam juxta nostra Acta fuerunt hec in ecclesia Sancti Egidii de Edynburg in capella Sancte Katerine virginis vicesimo quarto die mensis Aprilis anno Domini millesimo trecentesimo septuagesimo tertio