Charter Document - 06190034

Universis sancte matris ecclesie filiis has litteras inspecturis Robertus senescallus Scotie comes de Stratherne salutem in Domino Cum antecessores et progenitores nostri quendam locum religiosum videlicet monasterium de Passeleto ordinis Cluniacensis Glasguensis dioecesis in honorem Dei Sancte Marie matris ejus Sanctorum Jacobi Mirini et Omnium Sanctorum ac pro salute animarum antecessorum et successorum suorum pie devotionis affectu ducti ac divini cultus augmentatione fundaverunt ipsumque de propria substantia tam scilicet ecclesiis quam terris et aliis possessionibus honorifice dotaverunt et multis privilegiis et libertatibus muniverunt ac ad serviendum Deo beate matri sue beatis Jacobo Mirino et Omnibus Sanctis et ad celebrandum pro animabus suis antecessorum et successorum suorum necnon et pro animabus omnium fidelium defunctorum numerum monachorum non modicum perpetuis temporibus duraturis specialiter ordinarunt quondam Abbas dicti monasterii quo nescimus spiritu ductus quamdam immensam donationem seu alienationem quadraginta marcarum sterlingorum annue pensionis nulla causa utili vel necessaria suadente nec etiam aliqua causa Magistro canonicis et monialibus de Simpringham in Anglie sine licentia consensu vel auctoritate alicujus sui superioris ecclesiastici vel secularis auctoritate propria immo verius facilitate vel temeritate de facto cum de jure non posset et facere presumpserit quod in divini cultus deminutionem et dicti monasterii dampnum non modicum et lesionem et egentium animarum de rogamen et nostrum prejudicium et gravamen redundare dubium non existit Unde nos volentes dicti monasterii indemnitati consulere et providere et incommoditatibus in opportunitatibus et inconvenientiis que ex dicta alienatione secuntur pro ut nobis ex alto datum fuerit obviare dictam alienationem dicte pensionis quadraginta marcarum facte dictis Magistro canonicis et monialibus de Simpringham sic de facto presumptam et quicquid ex dicta alienatione vel ob eam secutum fuerit quatenus dictum monasterium nostrum de Passelet cujus sumus patronus et defensor specialis vel eidem prejudicialis existat pro nobis et successoribus nostris in hiis scriptis penitus revocamus ac nullum et irritum ipso jure haberi et censeri tenore presentis volumus et pronunciamus Et ne dictam pensionem quadraginta marcarum aliquibus dicti religiosi de Passelet ulterius solvant cum nostra in hoc intersit ipsis strictius quo poterimus per presentes inhibemus cum jam per nos dicta pensio quadraginta marcarum cum omnibus aliis possessionibus et terris quas quondam Reginaldus More et dominus Willelmus More infra dominium nostrum habuerunt virtute cujusdam submissionis per predictum Reginaldum in nos facte in dictos Abbatem et conventum de Passelet perpetuo sit translata et eorum usibus penitus applicata pro ut in carta nostra dictis religiosis de Passelet super hoc facta plenius continetur Et hoc omnibus et singulis quorum interest notum facimus presentis per tenorem In cujus rei testimonium sigillum nostrum presentibus penes Abbatem et conventum monasterii de Passeleto inperpetuum remansuris fecimus apponi apud castrum de Raythysay quinto die mensis Aprilis anno Domini millesimo trecentesimo sexagesimo septimo