Charter Document - 06190032

Omnibus hanc cartam visuris vel audituris Robertus senescallus Scotie comes de Stratherne et Johannes Senescallus primogenitus et heres ipsius dominus barronie de Kyle salutem in Domino sempiternam Cum dudum Reginaldus More pater domini Willelmi More militis concesserit et pro se et heredibus suis firmiter obligaverit omnes terras suas subcriptas in baronia de Kyle et de Cowell videlicet terram de Sanakar de Camceskane de Dowlargis de Cowdane de Stafflour et terram de Hormyfdall et quascunque alias terras suas aut possessiones infra dominium nostrum existentes religiosis viris Abbati [et] conventui monasterii de Passeleto ordinis Cluniacensis Glasguensis dioecesis fore applicandas et perpetuis eorum usibus apropriandas in casu quo ante primam solutionem sibi faciendam cujusdam annui redditus quadraginta marcarum in quo dicebat idem Reginaldus dictos Abbatem et conventum Magistro canonicis et monialibus de Simpringham in Anglie singulis annis obligari litteras quiete clamationis et perpetue securitatis a predictis Magistro canonicis et monialibus de Simpringham non procuraret ac eisdem Abbati et conventui monasterii de Passeleto deportaret et exhiberet sic quod dicti Abbas et conventus de Passeleto predictarum litterarum pretextu et virtute muniti predictis Magistro canonicis et monialibus de Simpringham de predicto annuo redditu in toto vel in parte non tenerentur inperpetuum ulterius respondere ac super hoc predictus Reginaldus pro se et heredibus suis subjecerit dictas terras voluntati ordinationi et [] Scotie qui pro tempore fuerit patronus dicti monasterii de Pasleto quod libere possit in favorem dictorum religiosorum virorum Abbatis et conventus monasterii de Passeleto et ad requisitionem eorundem sine aliqua difficultate ipsis dare seysinam de terris et possessionibus supradictis prout hec et alia in patentibus litteris Reginaldi More [sub] sigillo suo ac sigillo nostro Roberti senescalli Scotie supradicti nec non sigillo officialis curie Glasguensis plenius vidimus contineri Nos vero Robertus senescallus Scotie supradictus et Johannes Senescallus primogenitus ipsius dominus de Kyle per Abbatem et conventum monasterii de Passeleto cum instantia requisiti quod cum dictus Reginaldus et dominus Willelmus filius suus et heres predictum annuum redditum per plures annos a tempore dicte obligationis et promissionis factarum a dictis religiosis percepit ac ipsi per captionem nanorum et compulsionem terrarum suarum aliquando maxime per dictum Dominum Willelmum More coacti et compulsi ipsum annuum redditum persolverint nulla littera quitationis aut securitatis promisse pro parte dicti Reginaldi aut dicti domini Willelmi juxta formam dicte sue obligationis eisdem Abbati et conventui monasterii de Passeleto deportata exhibita vel ostensa procederemus ad dandam seysinam eisdem religiosis viris Abbati et conventui monasterii de Passeleto de terris et possessionibus supradictis juxta dictarum litterarum continentiam atque formam Volentes ad requisitionem eorundem et virtute obligationis predicte et submissionis in nos facte predictis Abbati et conventui monasterii de Passeleto super premissis de remedio debito providere ipsas terras videlicet terram de Sankar de Camceskane de Dowlargis de Cowdane de Stafflour terram de Hormisdalle in manibus nostris ex unanimi nostro consensu propter hoc prius seysytas ad tempus et ex causa Deo beate Marie Sancto Jacobo Sancto Mirino et religiosis viris Abbati et conventui monasterii de Passeleto ibidem Deo servientibus et inperpetuum servituris damus concedimus et hac presenti carta nostra confirmamus Tenendum et habendum eisdem religiosis viris et eorum successoribus de nobis et heredibus nostris in puram et perpetuam elemosinam adeo libere quiete pacifice et honorifice per omnes rectas metas suas et divisas in boscis planis pratis pascuis et pasturis viis semitis moris morasiis aquis stagnis multuris molendinis et eorum sequelis piscationibus aucupationibus et venationibus et cum omnimodo aliis libertatibus commoditatibus aisiamentis et justis pertinentiis ad predictas terras et earum quamlibet spectantibus seu juste spectare valentibus in futurum sicut dicti religiosi viri aliquam terram elemosina tam de nobis vel predecessoribus nostris liberius possident sive tenent tenuerunt vel possiderunt Et in casu quo dictus Willelmus More vel aliquis heredum suorum possit docere aut docuerit per aliquas evidentias quas exhibere vel ostendere poterit pro parte Magistri canonicorum et monialium de Simpringham quod jus et proprietas percipiendi dictam pensionem quadraginta marcarum annuatim in dictum quondam Reginaldum et heredes suos vel in dictum dominum Willelmum et suos heredes sint titulo vel aliis quomodo libet per dictos Magistrum canonicos et moniales inperpetuum et omnino vel ad tempus quod nondum transivit translata volumus et pro nobis et heredibus nostris inperpetuum concedimus ac virtute supradicte submissionis in nos facte declaramus et pro declarato haberi volumus quod ipsa pensio quadraginta marcarum sic in ipsos per dictos Magistrum canonicos et moniales trans[lata] censeatur et computari debeat et censeri inter alias possessiones ipsorum quondam Reginaldi et domini Willelmi et heredum suorum nostre ordinationi et dispositioni submissas et ipsis religiosis Abbati et conventui perpetuo applicandas ut supra ipsamque pensionem ipsius submissionis pretextu eisdem cum aliis supradictis terris et possessionibus inperpetuum applicamus sic pro [ea] nec dicto domino Willelmo vel heredibus suis aut ipsis Magistro canonicis et monialibus de Simpringham in hoc casu teneantur aliquibus futuris temporibus ali qualiter respondere In cujus rei testimonium presenti carte nostre sigilla nostra sunt appensa Hiis testibus venerabili patre domino Roberto abbate de Kilwynine domino Hugone de Eglynton domino ejusdem domino Alexandro Senescallo domino Crukston domino Johanne de Daniotston domino ejusdem domino Ade de Fowlerton domino de Corsbi militibus Thoma Sympyl domino de Egliston Johanne de Maxwel domino de Polloc Glosmo de Cowran et multis aliis