Charter Document - 06190031

Universis presentes litteras inspecturis Officialis curie Glasguensis salutem in Domino Noveritis quod anno gratie millesimo trecentesimo vicesimo octavo tertiodecimo die mensis Februarii in presentia nostra in ecclesia cathedrali Glasguensi constituti Andreas de Kelkou prior monasterii de Passelet procuratorio nomine Abbatis et conventus dicti monasterii ex parte una habens ad infrascripta speciale mandatum Et Reginaldus More procurator Magistri canonicorum et monialium domus de Simpringham ex altera generale tantum habens procuratorium de lite seu controversia inter dictum Reginaldum nomine procuratorio dicte domus de Simpringham et Abbatem et conventum de Passelet super quadam pensione annua quadraginta marcarum per dictum Reginaldum petitarum per non modicum tempus non solutarum a dictis Abbate et conventu de Passelet ac super arreragiis dicte pensionis et penis appositis dictus Reginaldus quia mandatum speciale non habuit ad compromittendum transignandum componendum et pacificandum sub pena centum librarum quod tale procuratorium cum speciali mandato sigillo communi domus de Simpringham sigillatum procuratori Abbatis et conventus de Passelet exhiberet ante festum apostolorum Philippi et Jacobi Compromiserunt in personas infrascriptas tanquam in amicabiles compositores videlicet in venerabilem patrem dominum Jacobum Dei gratia Sancti Andree episcopum et dominum Robertum de Lawdyr justiciarium Laudonie ex parte dicti Reginaldi electos et nobiles viros dominos Jacobum de Duglas dominum de eodem et Alexandrum de Meynes ex parte procuratoris dicti monasterii electos et in nobilem virum dominum Thomam Ranulphum comitem Moravie comuniter a dictis partibus electum si dicti quatuor concordare non poterunt super dictis arreragiis et penis per procuratorem dicti monasterii de Passelet negatis quia principale fatebatur videlicet pensionem quadraginta marcarum et eam debere prestare a tempore pacis inter regna Scotie et Anglie proclamate ita quod quicquid ipsi quatuor vel quinque si necesse fuerit super premissis arreragiis et penis ordinaverint vel fecerint seu arbitrati fuerint de plano alte et basse juris ordine servato vel non servato diebus feriatis vel non feriatis stando vel sedendo prout ipsis visum fuerit de jure secundum discretionem eorundem [observetur] et ad illud observandum quod per ipsos ordinatum seu arbitratum fuerit utraque pars corporale prestitit juramentum et consenserunt quod octavo die post festum sancte Trinitatis quelibet pars suos arbitros seu amicabiles compositores predictos vel alios loco illorum si ipsos habere non poterint apud Berwycum adducat sub pena amissionis dictorum arreragiorum et penarum ex parte dicti procuratoris de Simpringham et dominorum suorum et sub pena solutionis eorundem ex parte dicti procuratoris monasterii de Passelet et Abbatis et conventus ejusdem Si vero dictus Comes non poterit vel noluerit interesse dicte partes si necesse fuerit eligent quintum loco ipsius Comitis et si ipsi eligendo concordare non poterunt predicti quatuor arbitri seu amicabiles compositores quintum sibi eligent Et infra sex septimanas ab octavis sancte Trinitatis predicte dicta controversia per dictos arbitros terminabitur sub pena amissionis dictorum arreragiorum et penarum et solutionis eorundem ut premittitur ex parte illius cujus arbitri dictam controversiam non terminaverant seu steterint per ipsos quominus infra predictum tempus terminetur In cujus rei testimonium sigillum officii nostri ad requisitionem dictarum partium presentibus est appensum