Charter Document - 06180005

Notum sit omnibus quod cum inter Henricum Priorem et canonicos de Leghe Exoniensis diocesis ex parte una et Johannem de Clavilla Dominum de Burlescumbe ex altera parte super custodia prioratus de Leghe tempore vacationis ipsius quam custodiam idem Johannes clamat ad se pertinere tanquam ad patronum ejusdem prioratus orta esset materia contencionis tandem communibus amicis intervenientibus sopita est finaliter dicta contentio in hunc modum videlicet quod quotienscunque vacabit Prioratus predictus idem Johannes et heredes sui eligent janitorem qui prius fuerat in eodem prioratu vel quemcunque alium servientem dicti prioratus pro voluntate dicti Johannis et heredum suorum et personam per eos sic electam jurare faciant super sancta Evangelia quod durante dicta vacatione portam domus predicte fideliter custodiat Ita quod non permittet aliquos exteriores Prioratum predictum intrare vel interiores aliquid de bonis domus asportare ad dampnum domus quominus elemosina dicti Johannis heredum et progenitorum suorum bene et fideliter custodiatur Concessit insuper dictus Johannes pro se et heredibus suis quod ratione vacationis predicte domus quandocumque vacaverit nihil sive de bonis dicte domus appropriare vel quicquam aliud ratione patronatus in ea vendicare possint imperpetuum quam id quod superius est expressum In cujus rei testimonium presenti scripto duplicato supradicte partes hinc inde sigilla sua apposuerunt Dat in festo Apostolorum Simonis et Jude Anno Domini MCCLXXX secundo Anno R R Edwardi decimo Presentibus Magistro Waltero de Lecchelade Precentore Exoniensi et Domini Petri Exoniensis Episcopi tunc Vicario Nicholao Silvayn Simone Rectore Ecclesia de Bagewrthe Henrico de Berneville Willelmo fratre suo Willelmo Lampreic Waltero de Claville et aliis