Charter Document - 06159030

A tous ceus qui cestes presentes lettres verront et orront je Pierres seignieur de Preaus chevalier salut en nostre seignieur Comme contens fust meu entre moi d'une part et hommes relegieus le prieur et le couvent de Saint Lô de Rouen d'autre sus le droit de patronage de leglise de Saint Ligier de Bourdeni lequel droit je disois que a moi apartenoit et devoit apartenir les desus dis relegieus tout le contraire disans et affermans sil est a savoir que tout le devant dit droit estoit leur et leur apartenoit et appartenir devoit En la parfin veues de moi et de mon conseil et de mes amis les lettres les munimens et les confirmations des dis relegieus qu'ils avoient sus chen et considerees toutes les choses qui me povoient et devoient a chen monnoir je ai veu seu et apercheu que je n'avois pas bien droit au patronnage desus dit ne d'oposer moi a chen contre les dis relegieus et que le droit du patronnage desus dit est et apartient et doit apartenir as relegieus devant dis pour laquele chose je devant dit chevalier pour moi et pour mes hoirs et par pitie et par carite et pour le salu de l'ame de moi et des ames de mes ancheseurs quite a tous iours perdurablement et entout delaisse en bone pes as desus dis relegieus et a leur successeurs tout le droit du patronage devant dit et fere d'icheli tant come du leur toute leur volente sans contens sans empeschement et sans opposicion que moi ou mes hoirs i puisson mettre ou fere en aucun tens present ou a venir Et en tesmoing de chen je le desus dit chevalier ai donne et octroie as desus dis relegieus ches presentes lettres seelees de mon seel et furent fetes en l'an de grace MCCXC et dis et set Tesmoins Robert de Espinevile escuier Guillaume dit le forestier du Fauc Alain de Gourrel escuier Iehan du bosc escuier Nicole adonc prestre de seint Denis de Rouen et autres