Charter Document - 06159015

Universis presentes litteras inspecturis Willelmus de Saana thesaurarius ecclesie Rothomagensis arbiter seu arbitrator vel amicabilis compositor communiter electus inter religiosos viros priorem et conventum Sancti Laudi Rothomagensis ex una parte et magistrum Galterum rectorem ecclesie Sancte Columbe ex altera salutem in Domino Noverit universitas vestra quod cum a dictis partibus in nos fuerit compromissum super eo videlicet quod dicti religiosi petebant a dicto rectore ratione ecclesie sue predicte decem solidos turonenses annui redditus seu annualis pensionis quam dicebant se habere in ecclesia predicta ita quod nos possemus super premissis alto et basso ordinare inter dictas partes iuris ordine observato seu etiam preter misso die etiam feriata seu non feriata sine strepitu iudicii dictis partibus presentibus seu absentibus et hec promiserint dicte partes se inviolabiliter observaturas videlicet dictus rector nomine suo et ecclesie sue predicte et Ricardus de Hotot clericus procurator dictorum religiosorum per litteras procuratorias sigillo dictorum religiosorum sigillatas ut apparebat hiis potestatem compromittendi nomine eorumdem religiosorum sub pena decem librarum turonensium solvendarum parti observanti dictum seu ordinationem nostram a parte resiliente ab eodem seu per quam staret quominus in dicto arbitrio ulteriori procederemus Tandem nos pro bono pacis habito prudentium virorum consilio ita dicimus pronunciamus seu ordinamus quod dictus rector solvat et reddat singulis annis ratione ecclesie sue predicte dictis religiosis et eorum prioratui et eorum successoribus quinque solidos turonenses in festo beate Marie Magdelene ratione annualis pensionis supradicte Quod omnibus et singulis volumus esse notum Datum anno Domini MCCLX sexto die veneris ante festum beate Marie Magdalene