Charter Document - 06153013
| Charter Number: | 06153013 |
|---|---|
| Cartulary Title: | Histoire du Prieuré de Saint-Lô de Rouen |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1257 |
| Date type: | Internal, A.D. |
| Resource Link(s): |
|
Charter:
Omnibus Christi fidelibus presentes litteras inspecturis vel audituris magister Nicholaus rector ecclesie de Frobervilla in Caleto salutem in domino Noveritis me dedisse et concessisse in puram et perpetuam elemosinam Deo et priori et conventui Sancti Laudi Rothomagensis pro salute anime mee patris mei necnon omnium antecessorum et amicorum ac benefactorum meorum omnia edificia quecunque feci et quecunque potero de cetero facere vel acquirere tam in domibus quam in clausuris sive etiam libertatibus seu alio quocumque modo in masuagio dictorum prioris et conventus sito iuxta grangiam eorum in parrochia de Frobervilla quod masuagium tradiderunt michi quoad vixero dumtaxat nomine locationis dicti prior et conventus pro tribus solidis usualis monete annui redditus eisdem vel eorum mandato singulis annis a me seu a mandato meo ad nativitatem Domini libere persolvendis ita quod ego volo et concedo ac presenti scripto confirmo quod dicti prior et conventus et eorumdem successores habeant et possideant omnes libertates et omnia edificia facta et facienda et acquirenda et etiam omnes meliorationes a me seu a mandato meo inibi faciendas in puram et perpetuam elemosinam salvo iure dominico sine reclamatione seu molestatione impedimentis vel etiam contradictione mei aut heredum seu successorum meorum in perpetuum ita quod possint de dicto masuagio et edificiis et meliorationibus post decessum meum suam penitus facere voluntatem In cuius rei testimonium presentes litteras sigilli mei munimine roboravi Actum coram parrochia de Frobervilla Anno Domini MCC quinquagesimo septimo mense iulii
Source (click image below to view full size)
