Charter Document - 06152063

Le cas est tel Il est verité que le priour de S Lo de Rouen est tenu et obligié de si loing temps qu'il n'est memore du contraire de tenir une grange qui est en la paroisse de Agon en bonne reparacion et bon estat pour en grangier la moytié de diexmes de la dicte parroisse a luy appartenante et auxi l'autre moytié des dites diexmes appartenante a sept de Messieurs de l'église de Coustances c'est assavoir aux trois prebendés en la parroisse de la Manseliere aux trois qui sont prebendés en la parroisse de Quiebou et a celuy qui est prebendey en la parroisse de S Sanson Item en precedent que on chairie les dites diexmes il doibvent estre subhastées a yssue de grande messe devant le cymetiere de la dicte parroisse au rabat du consentement des dites parties et baillies a charrier a deux chairtiers gens de bien et doibt payer le dit priour la moytié du coustage que les dites diexmes coustent à chairier et tasser et les dis sept chanoynes l'autre moytié et quant tout est assembley le dit priour et les dis sept chanoynes partent par moytié tous les grains et estrains des dites diexmes Item il a esté accoustumey en temps passey et de si long temps qu'il n'est memore du contraire jusques au temps que maistre Hugues de Laye natif du pays de Bourgougne est venu à traictier et gouverner la part dudit priour d'avoir eu en la porte de la dicte grange ung petit huysset euquel en laes de devant estoient attachiés et pendues deux serreures fermantes a deux clefs non semblables l'une à l'autre desquelles le dit priour ou ses fermiers et commis gardoient l'une et les dis chanoynes ou leurs commis gardoient l'autre et estoit et est chose bien juste et bien raisonnable pour eviter tous inconveniens et toutes mescreantises mes les pillars qui y sont de present de par le dit priour n'en sont pas contens Item quant les dites diexmes estoient engrangies le dit priour ou ses commis comme dit est gardoient l'une des dites clefs et les diz chanoynes ou leurs commis gardoient l'autre jusques a tant que on meist les bateurs en la dite grange qui estoit et est chose loyalle juste et raisonnable pour le bien profit et honneur desdites parties Item quant le temps est venu que on doibt batre les dites diexmes et mettre les bateurs en la dite grange par prix fait avecques les diz bateurs de lacort et consentement des dites parties ou de leurs commis les dis sept chanoynes y doibvent mettre deux bateurs pour leur garder leur clef et leur droit pour ung an et le dit priour y en doibt mettre ung pour luy garder semblablement son droit et sa clef et pour l'autre année le dit priour y doibt mettre deux bateurs et les dix chanoynes ung pour faire ce qui devant est escript qui est chose juste et raisonnable Item il a estey acoustumey de ainsy ce faire en temps passey mesmes en temps des Anglois jusques a ce que maistre Huges de Laye a commenchié a faire et faire faire ces excès et abus et osta ou fist oster il n'a pas xv ans ung aes de huysset de la porte o les dites serreures estoient pendues et en y fist mettre une neuve en laquelle il fist pendre une seule serreure