Charter Document - 06150064

A tous cheus qui ches lettres verront Robert de Esneval chevalier seigneur de Paveilly salut Comme contens fust meu ou entendu à mouvoir entre moi d'une partie et homes religieus le prior et le couvent de Saint Lô de Rouen d'autre sus le droit du patronnage de l'eglise de Nostre Dame de Bloville laquelle estoit franche et vacant et est encore par la mort de messire Raol Durant iadis recteur de la dite eglise et disoie et maintenir vouloie que le droit de patronnage de la dite eglise apartenoit a moi par plusieurs resons que ie disoie et maintenir vouloie et pour che que la dite eglise seoit en mon fié et au membre de mon haubert les dis religieus affremans et disans que le droit du patronnage de la dite eglise aveuc les apartenanches d'icele a euls apartenoit par les resons que il disoient et par une lettre seelee du seel au roy Henri d'Engleterre duc de Normandie Adonc quant elle fu fete en laquelle la dite eglise estoit confermee et en fesoit et fet la dite lettre expresse mencion pour laquel chose ie devant dit Robert fes assavoir a tous que ie du conseill de bone gent et par les letres as dis religieus et par la possession que il ont eu de si lonc tans que il ne peut souvenir a nul memoire du contrere leur ai quitie et delessie et par cheste presente lettre conferme tout le droit que ie avoie ou avoir povoie moi et mes hoirs au droit du patronnage de la dite eglise et es apartenanches d'ichele Ce veull et otroie pour le salut de m'ame et de mes ancezeurs que les devant dis religieus et leurs successeurs tiengnent aient et posseent des ore en avant tout le droit du patronnage de la dite eglise sans nul empeechement et nule reclamanche de moi ne de mes hoirs Et sans che que iames ne moi ne mes hoirs au droit du patronnage de la dite eglise et es apartenanches d'ichele puissen riens avoir ne demander ne dire que a nous deust apartenir que tout le droit que ie devant dit Robert y ai ou avoir peusse et deusse ie leur doins et quite et delesse sans che que des ore en avant ne moi ne mes hoirs y puissen riens demander ne reclamer Et pour che que che soit ferme et estable en tant a venir i'ai cheste presente letre seelee et confermee de l'emprainte de mon seel Che fu fet le diemenche apres la Quasimodo l'an de grace mccc et vii