Charter Document - 06130243

De Intrusionibus qualiter debent placitari Provisum est etiam et concessum quod si quis disseisitus fuerit de tenemento suo infra libertatem Civitatis et venerit ad hustengum vel curiam infra xl septimanas post disseisinam vel intrusionem illam et queratur vicecomitibus de disseisina illa statim audiatur et disseisitor si inventus fuerit vel ballivus suus pro eo si ipse inventus non fuerit attachietur quod sit ad diem quem vicecomites ei dabunt ad locum ubi disseisina facta fuerit una cum uno vicecomite si alius interesse non possit et aldermanno loci et ibidem coram vicecomitibus et aldermanno et aliis de visneto statim et sine dilacione plenariam justiciam exhibeant querenti Ita quod si disseisitor vel intrusor convictus fuerit per veredictum xij de visneto de disseisina vel intrusione illa tunc querens rehabeat seisinam suam una cum dampnis que habuit per disseisinam illam et que ei adiudicabuntur per veredictum predictorum xij Et tunc idem intrusor vel disseisitor attachietur per xij bonos plegios quod sit coram justiciariis nostris in primo adventu suo apud Turrim Londoniarum ad respondendum ibidem de transgressione illa Et bene provideant vicecomites interim quod plegii tales sint quod unusquisque possit respondere domino regi de dimidio marce ad minus si predictus disseisitor vel intrusor coram justiciariis non venerit Si autem disseysitor vel intrusor vel ballivus suus ad locum et diem quos vicecomites ei dabunt non venerit nichilominus plena iusticia fiat querenti in forma predicta et plegii sui si attachiati fuerint sint in misericordia [] Si autem querens cadat pro falsa querela sua sit in misericordia vicecomitum et dampna que adiudicata fuerint ipsi disseisito inrotulentur in rotulis camerarii et vicecomitum ut secundum dampna illa coram justiciariis apud Turrim Londoniarum amercietur Et camerarius habet omnia attachiamenta que spectant ad disseysinam vel intrusionem inrotulata in rotulis suis