Charter Document - 06130233
| Charter Number: | 06130233 |
|---|---|
| Cartulary Title: | The London Eyre of 1244 |
| Charter Language: | Latin |
| Charter Origin: | Royal |
| Charter Type(s): | Pleas of the Crown |
| Date: | 1244 |
| Date type: | Assigned |
| Resource Link(s): |
British History Online |
Charter:
Provisum est per dominum regem et justiciarios suos et a civibus Londoniarum concessum quod si archiepiscopi episcopi comites barones et alii qui redditus habent in Civitate Londoniarum in aliquibus tenementis et redditus sui a retro fuerunt nec ad redditus illos possint recuperare quod bene liceat eis distringere tenentes suos pro arreragiis suis quamdiu aliquid inveniatur in feodo per quod distringi possint Si autem nichil inveniatur in feodo per quod distringi possint tunc ipsi tenentes implacitentur de gaveleto per quoddam breve de consuetudine et servicio quod bene potest fieri per sokerevos eorum in hustengo presentatos ad custodiam sokne sue et redditus suos colligendos ita quod si tenentes cognoverunt servicium suum statim et sine omni difficultate satisfaciant dominis suis de arreragiis illis et serviciis suis Si autem servicia sua eis denegaverint petentes eis statim nominabunt sectam suam scilicet duos testes Et abbreviabuntur Et habebunt diem producendi eos ad proximum hustengum ad quem diem si ipsos testes produxerint et per eos in plena curia ostendatur ut de visu suo et auditu quod ipsi querentes aliquando perceperint redditus quos petunt de tenentibus suis tunc ipsi tenentes amittent feoda sua per judicium curie Et querentes recuperabunt tenementa sua in dominico Si autem ut predictum est cognoverunt dominis suis servicia et similiter arreragia tunc per iudicium dicte curie dupplicabunt arreragia et dabunt vicecomitibus pro iniusta detencione si ad hoc sufficiunt sine gravamine c solidos Si autem tenentes post debitam summonicionem ad hustengum non venerint tunc feoda illa in pleno hustengo querentibus liberabuntur tenenda in manibus suis per unum annum et unum diem infra quem terminum si tenentes venerint ad eos et optulerint eis satisfacere de arreragiis suis dupplicandis et vicecomitibus de misericordia ut predictum est tunc rehabebunt tenementa sua sin autem post annum et diem completum remanebunt tenementa illa dominis feodorum illorum per judicium eiusdem curie in dominico suo imperpetuum Et tunc vocantur tenementa illa forshort eo quod imperpetuum remanent in dominico dominis feodorum pro defectu servicii Idem autem tenendum et observandum est si tenentes cognoscant arreragia sua et non possint inde satisfacere secundum quod predictum est