Charter Document - 06130063

Eodem anno eisdem camerario et vicecomitibus existentibus accidit die Lune proxima post festum Sancti Barnabe Apostoli quod quidam Edwardus de Bray teler verberavit Aliciam filiam Ricardi de Wiltone in campis versus Stebenhethe et ipsam male tractavit et brachium suum fregit in duobus locis ita quod eadem Alicia dum vixit eum appellavit et in prosequendo suum appellum obiit de batura illa Et post mortem suam quedam soror sua prosecuta fuit appellum et obiit in prosequendo Et Edwardus fuit attachiatus per appellum suum et modo venit dominus rex et sequitur versus eum et quesitum est ab eo qualiter vult defendere se de morte illa dicit quod vult defendere se secundum legem et consuetudinem Civitatis Londoniarum et committitur vicecomitibus donec sciatur qualiter se purgare debeat Post veniunt maior et cives et dicunt quod ex quo nullus sequitur versus eum nisi dominus rex ipse debet vadiare legem suam et defendere se septima manu sua et non tricesima sexta Ita quod si deficiat in purgacione sua idem iudicium habeat ac si defecerit in lege cum xxxvj manu Si autem faciat legem suam quietus inde sit Dicunt etiam quod ex quo aliquis defendat se per legem cum xxxvj vel septima manu maior et cives absentibus camerario et vicecomitibus debent eligere super sacramentum suum et fidem qua tenentur domino regi purgatores per quos lex debet fieri de melioribus et fidelioribus Civitatis in presentia illius qui purgare se debet per legem Ita quod si aliquis sit eius inimicus vel essoniabilis et iustam causam ostenderit ipsum possit refutare Et a die eleccionis purgatorum que est prefigenda ad voluntatem justiciariorum prefigenda est ei dies a die illa in xv dies de iure nisi justiciarii ei terminum ulteriorem velint prefigere Contrarium autem invenietur postea ad quem diem si non venerit pro convicto habebitur Et committetur per ballium per xij infra terminum predictum Ita quod quilibet plegius sufficiens sit ad respondendum domino regi de c s si ipsum ad terminum et diem non habuerint Sciendum est etiam quod postquam aliquis fuerit appellatus et attachiatus pro morte hominis non potest exigere recognitionem antequam acquietaverit se de appello versus eum facto et interim si non possit invenire plegios committatur prisone