Charter Document - 06050047

Ad honorem dei et virginis gloriose omniumque sanctorum et sacrosancte matris ecclesie exaltacionem necnon specialiter ad salutem anime bone memorie magistri Willelmi de Donelm defuncti scolariumque profectum eiusdem in Uniuersitate Oxonie studencium per dominum Cancellarium Oxonie venerabilesque doctores in sacra pagina tunc regentes una cum procuratoribus ac per quosdam doctores et alios magistros in singulis facultatibus ab Uniuersitate deputatos ad hoc specialiter vice et auctoritate dicte Uniuersitatis unanimiter ab eisdem exstitit modo quo sequitur ordinatum In primis ordinatum est quod in electione cuiuscumque socii ad elemosinam per antedictum magistrum Willelmum assignatam scolaribus de cetero facienda omnes et singuli socii quibus ex elemosina ministratur eiusdem et qui pro tempore electionis presentes fuerint eligent sine accepcione patrie uel personarum talem quem credunt ornatum moribus in facultatibus pauperem et ad proficiendum in facilitate Theologica magis aptum ceteris uero paribus ordinarunt quod ille preferatur ceteris qui de partibus Donelmie proximo oriundus exstitit Electores uero electum suum quam cicius poterunt dictis domino Cancellario et doctoribus sacre Theologie una cum procuratoribus presentent qui ad deliberandum de electo et eius condicionibus biduum habeant aut triduum et extunc iuxta consciencias eorum ipsum reprobent uel admittant Quod si contingat ipsum ex causa legittima reprobari absque omni strepitu iudiciali predicti socii iuxta formam qua prius alium eligant sine mora Ordinatum est eciam quod omnes socii de domo audiant Theologiam continue ita quod aliam facultatem audiendo non admisceant nisi in magna uacacione et tunc liceat eiis audire decretales si voluerint vel decreta Ordinatum est insuper quod socii simul maneant in una domo ita quod absens quocumque colore in uilla uel extra pro tempore absencie nichil percipiat nisi fuerit absens causa recreacionis et tunc ultra mensem non percipiat sed cum presens fuerit pro eo liberetur consueta communa Item procurator eorum qui et bursarius dicitur ultra quemcumque alium decem solidos annuos percipiat pro labore Item habeat quilibet socius pro pensione domus et salario famulorum et aliis necessariis ultra communas suas dimidiam marcam annuatim Item si contingat aliquem ultra plenum terminum absentare licencia a sociis non optenta eligatur alius loco sui nisi aduersa ualitudine uel alia legittima causa in aliis partibus ne veniat fuerit inpeditus Item si aliquis fuerit promotus ad beneficium quinque marcarum non percipiat ulterius de elemosina predicta sed loco sui alius eligatur Item quod quilibet socius infra septennium sue audicionis in scolis opponat et ulterius proficiat prout decet Item ordinatum est quod dicti scolares qui pro tempore fuerint duas missas singulis annis in parochia ubi degunt pro anima fundatoris faciant celebrare Item quod senior si non est capellanus se faciat capellanum quam cito poterit ordinari Item quod nomine uulgari quantum in eiis est scolares magistri Willelmi de Donelmia se faciant nominari Item quod procurator domorum qui pro tempore fuerit de omnibus receptis et expensis coram Cancellario et quibusdam aliis per ipsum vocandis et coram comitiua singulis annis citra resumpcionem magistrorum post Pentecosten fidele compotum reddat prius ad hoc corporali prestito sacramento socii eciam compoti auditores ad compotum fideliter examinandum in virtute sacramenti prestiti astringantur Item ordinarunt prefati quod si aliquem a prefata domo uel officio in illa propter aliquod sinistrum amoueri contingat cognoscendi de causa summarie et amouendi culpabilem dicti Cancellarius et doctores una cum procuratoribus Uniuersitatis omnem habeant potestatem Item ordinatum est quod ad augmentacionem reddituum sufficienter pro uno socio nouus socius eligatur Item si in aliquo predictorum fuerit hesitacio seu dispensacio facienda super omnibus talibus habeant predicti dispensandi plenarie potestatem Item recitent inter se has ordinaciones diebus singulis quibus pro suo celebrant fundatore Item ordinatum est quod dicti scolares singuli et eorum successores in primo sui ingressu sacramentum prestent corporale quod omnes supradictos articulos inuiolabiliter obseruabunt nisi beneficium dispensacionis fuerint adepti Hec ordinarunt predicti dominus Cancellarius et doctores ut premittitur aliis ordinacionibus seu statutis quibuscumque istis non contrariis nichilominus in suo robore duraturis Dat Oxonie in ecclesia beate virginis quinto Nonas Iulii anno domini milesimo trecentesimo undecimo In cuius rei testimonium parti huius scripti indentati penes predictos scolares remanenti sigillum commune Uniuersitatis est appensum alteri uero penes Uniuersitatem residenti ad procuracionem predictorum scolariurn sigillum Decani Cristianitatis Oxonie est appositum