Charter Document - 06050032

Edwardus dei gracia rex Anglie dominus Hibernie et dux Aquitannie dilectis et fidelibus suis Willelmo de Hereford et Henrico de Thystelden salutem Quia accepimus quod quidam malefactores et pacis nostre perturbatores de uilla Oxonie occasione cuiusdam contencionis nuper inter Cancellarium et Uniuersitatem scolarium eiusdem uille et maiorem et communitatem ibidem suborte domos quorundam scolarium eiusdem Uniuersitatis infra eandem uillam ui et armis ingressi scolares illos ceperunt uerberauerunt uulnerauerunt male tractauerunt et postmodum imprisonauerunt et bona et catalla sua in eisdem domibus inuenta ad ualenciam mille librarum similiter ceperunt et asportauerunt et alia enormia eis intulerunt in ipsorum scolarium dampnum non modicum et grauamen et contra pacem nostram Nos si ita sit super hoc celere remedium fieri uolentes assignauimus uos iustictarios nostros ad inquirendum per sacramentum proborum et legalium hominum de comitatu Oxonie per quos rei ueritas melius sciri poterit plenius ueritatem premissorum et ad transgressiones illas audiendas et terminandas secundum legem et consuetudinem regni nostri Et ideo uobis mandamus quod ad certos dies et loca quos ad hoc prouideritis inquisicionem illam faciatis et transgressiones illas audiatis et terminetis in forma predicta facturi inde quod ad iusticiam pertinet secundum legem et consuetudinem regni nostri saluis nobis amerciamentis et aliis ad nos inde spectantibus Mandauimus enim uicecomiti nostro comitatus predicti quod ad certos dies et loca quos ei scire facietis uenire faciat coram uobis tot et tales probos et legales homines de balliua sua per quos rei ueritas in premissis melius sciri poterit et inquiri In cuius rei testimonium has litteras nostras fieri fecimus patentes Teste Edwardo filio nostro apud Fuleham XXVII die Februarii anno regni nostri uicesimo sexto per consilium