Charter Document - 06050027

In dei nomine Amen Presenti pagina pateat uniuersis quod cum dominus Oliuerus de Suttone dei gracia Lincolniensis episcopus discretum uirum magistrum Henricum de Stauntone Cancellarium Uniuersitatis Oxonie ac magistros Robertum de Burgo et Willelmum de Coleshulle procuratores Uniuersitatis eiusdem coram se ad diem Iouis in septimana Pentecost anno domini MCCLXXX primo super iniuriis et contemptu ac aliis ex officio eiusdem episcopi sibi obicieridis circa statum uisitandi et corrigendi magistros et scolares Uniuersitatis eiusdem apud Bukedene responsuros peremptorie citari fecisset ac quosdam de magistris et scolaribus eiusdem Uniuersitatis coram se ad diem Iouis proximum ante festum Pentecost anni eiusdem ubicumque tunc foret in sua diocese super incontinencie uicio de quo in ultima uisitacione eiusdem domini episcopi in municipio Oxonie facta inueniebantur notati ad sibi obicienda responsuros peremptorie fecisset consimiliter euocari tandem prenominatus Cancellarius et duo procuratores predicti ac magister Willelmus de Monteforti precentor Herfordensis et alii sollempnes nuncii Uniuersitatis eiusdem ad ipsius domini episcopi presenciam apud Londonias accesserunt Qui asserentes ius uisitandi et corrigendi magistros et scolares predictos Cancellario competere ex generali commissione domini Lincolniensis episcopi cuilibet Cancellario Uniuersitatis tempore prefeccionis sue facta et de longa consuetudine hactenus approbata eidem domino episcopo supplicarunt humiliter et deuote ut idem ordo qui in cognicionibus causarum inter magistros et scolares de consuetudine adhibetur eciam in uisitacionibus et correccionibus peccatorum et excessuum corundum consimiliter seruaretur ut huiusmodi correcciones nonnisi in defectum Cancellarii et Uniuersitatis iuxta gradus et ordinem per uiam appellacionis in causarum cognicionibus obseruatum ad cognicionem episcopi pertinerent supplicantes insuper et petentes ut cum magistri seu scolares Uniuersitatis per uisitacionem seu inquisicionem domini episcopi inuenti forent super excessibus forsitan diffamati correccio eorundem per episcopum Cancellario committalur qui de sua correccione canonica eundem dominum episcopum ad serenacionem sue consciencie postmodum cerciorare fideliter teneatur eodem domino episcopo in contrarium asserente uisitacionem et omnem correccionem tam magistrorum quam scolarium Uniuersitatis eiusdem in delictis spiritualibus et peccatis ad ipsum immediate iure ordinario pertinere que etsi Cancellario uel Uniuersitati forsan dici posset competere quoquomodo episcopum tamen a uisitacione et correccione sua non possent excludere ullo modo presertim cum tam predecessores sui quam alii et superiores et inferiores prelati sui in possessione huiusmodi extitissent Consequenter autem post negocium huiusmodi tam in presencia domini archiepiscopi Cantuariensis et multorum coepiscoporum suorum quam eciam plurimorum aliorum communium amicorum diucius agitatum et racionibus diuersis uehemericius diuerberatum idem dominus episcopus ex intima affeccione peculiari quam ad eandem Uniuersitatem semper habuit et nunc habet uolens eidem Cancellario ac magistris et scolaribus Uniuersitatis eiusdem quantum cum deo potest salua professione sua per quam astrictus est iura pontificalia et ecclesie Lincolniensis seruare illesa specialiter complacere ex sua propria et mera liberalitate Cancellario procuratoribus et aliis Uniuersitatis eiusdem nunciis supradictis ad ipsorum peticionem et instanciam humilem et deuotam benigne concessit de gracia speciali ut quociens de cetero pro toto tempore suo in municipio Oxonie super clerum et populum uisitacionem generalius seu specialius duxerit faciendam si aliquos de magistris superioribus uel inferioribus aut scolaribus aliis de delictis spiritualibus et peccatis inuenerit infamatos cognicionem et correccionem omnium huiusmodi peccatorum siue notoriorum siue non notoriorum Cancellario Uniuersitatis pro pace et quiete eiusdem Uniuersitatis ne scolares a suis studiis distrahantur sine difficultate qualibet speciali commissione committet ita quod Cancellarius in omnibus et in singulis huiusmodi correccionibus uice et auctoritate eiusdem domini episcopi legittime procedens pena canonica feriat delinquentes et extunc de processu suo per litteras suas dominum episcopum certificet pro tempore oportuno littera tamen commissionis eiusdem domini episcopi magistris Henrico Cancellario Willelmo de Monteforti iuris canonici et Roberto de Pykering iuris ciuilis professoribus prius facte nichilominus in suo robore duratura secundum quam iidem commissarii uice et auctoritate eiusdem domini episcopi super hactenus inuentis in uisitacione ipsius domini episcopi contra magistros et scolares Uniuersitatis ipsius fideliter exercebunt limam correccionis et iusticie complementum quacumque alia uisitacione et correccione cuiusuis alterius non obstante uniuersis priuilegiis libertatibus et consuetudinibus approbatis eiusdem Uniuersitatis in omnibus aliis generaliter uel specialiter sibi competentibus consimiliter manentibus semper saluis Quibus eciam omnibus Cancellario magistris et scolaribus uniuersis omnem iniuriam et contemptum qui eis occasione predictorum posset forsitan imputari dulcedine suaui corditer et totaliter idem dominus episcopus benigne remisit In quorum omnium hinc et inde concorditer acceptatorum testimonium et robur idem dominus episcopus et predictus magister Henricus de consensu procuratorum ac aliorum nunciorum predictorum sigilla sua presentibus per modum cyrographi confectis alternatim fecerunt apponi Acta et data apud Uetus Templum Lond die dominica et anno domini predictis quinto decimo Kalendas Iunii pontificatus eiusdem domini episcopi anno primo