Charter Document - 06050024

Edwardus dei gracia rex Anglie dominus Hybernie et dux Aquitanie uenerabilibus in Cristo patribus archiepiscopis et episcopis per regnum Anglie et terram Hybernie constitutis salutem Rem honestam agere credimus cum ad id ex officio regie dignitatis intendimus per quod diuini cultus augetur nominis et animarum salus uiuorum scilicet et fidelium defunctorum salubriter procuratur iocundum nichilominus reputantes si ad premissorum desiderates et felices effectus amore uirtutis effundimus cum efficacia preces nostras Cum igitur dilecti et fideles nostri [] Cancellarius et Uniuersitas uille nostre Oxonie ubi suum posuerunt triuium et quadriuium fundamenta ubi fons scaturit theologice facultatis ac ubi nude anime filiorum hominum uenientium de longinquis philosophie uestibus induuntur in ecclesia beate Uirginis dicti loci capellaniam quandam deliberatione sancta nuper et prouida duxerint statuendam ut in ea tam pro nostra consortis et liberorum nostrorum incolumitate corporea quam pro recolende memorie domini Genitoris ac aliorum progenitorum nostrorum et omnium benefactorum Uniuersitatis eiusdem remedio animarum maiestati diuine sacrificia offerantur et ad hec incommutabiliter exequenda perpetuum capellanum in ea cui necessaria pro sustentacione uite de proprio deputarunt duxerint ordinandum nosque desideremus ex corde quod pia ipsorum ordinatio et honesta fidelium Cristi subsidiis sustentetur ut deuotionis per hoc cumulus augeatur uniuersitatem uestram attente requirimus et rogamus quatinus diuine retributionis intuitu et nostrorum interuentu rogaminum omnibus qui ad missarum sollempnia capellanie predicte causa deuotionis et oracionis accesserint indulgentias aliquas secundum quod potestatis uobis a deo date requirit officium concedatis ut ex hoc uobis a deo premium et a nobis commendationis titulus et multiformium graciarum acciones possint et debeant merito prouenire Teste me ipso apud Wodestoke in crastino beati Thome martinis anno regni nostri tercio