Charter Document - 06050019

Cum frequens assidua inter Boreales Hybernienses esset contencio cuius occasione multociens studii tranquillitas Oxonie fuerit perturbata anno domini MCC sexagesimo septimo in uigilia beati Andree apostoli interuentu magistri Nicholai de Ewelme tunc in Cancellarium electi diuersarum facultatum professoribus ad concordiam diligenter laborantibus omnes controuersie prius inter eos habite sub hac forma amicabiliter conquieuerunt uidelicet quod quadam summa pecunie certis personis restituta omnibus hinc inde remissis contencionibus electe fuerunt ex utraque parte uiginti quatuor persone que uice omnium pacis osculum adinuicem contulerunt Uolentes itaque partes prefate non solum presentibus sed etiam futuris obuiare periculis ex parte Borealium quinque de quolibet comitatu sibi adiuncto fuerunt electi qui nomina omnium haberent singulorum Qui quidem electi tres sibi capitaneos elegerunt eis cum electorum consilio de omnibus suam communitatem tangentibus disponendi ordinandi obligandi potestatem tradiderunt Hybernienses autem de quatuor suis prouinciis octo personas elegerunt unum capitaneum eisdem suam conferentes similiter potestatem Iurauerunt eciam uice omnium certi de maioribus ad hoc assignati quod formam subscriptam pro posse obseruabunt aliis eisdem electis idem sacramentum prestantibus quod si contingat [quod absit] quod alicui Boreali uel Hyberniensi fuerit iniuria per aliquem ab alterutra parte illata primo amicabiliter per dictas personas ex utraque parte electas si fieri possit contencio sopiatur quod si dicta contencio amicabiliter sedari non possit per arbitros uel arbitratores uel amicabiles compositores auditis hinc inde propositis finiatur quibus deficientibus per Cancellarium uel ebdomodarios uel certos iudices ad hoc assignatos in forma iuris Uniuersitatis dicta controuersia terminetur Quod si uel inferens uel cui iniuria fuerit illata huic ordinacioni noluerit adquiescere ex utrorumque eiciatur societate nec iterato admittatur inter eosdem donec paruerit in prefatis Quod si contumaciter recesserit modum recessus episcopo loci sub testimonio suorum compatriotarum Cancellarius rescribat bonis eius nichilominus in Uniuersitate inuentis quousque paruerit sequestratis Quod si aliqui rebelles inueniantur pacis perturbatores Cancellario per illos de suo comitatu uel prouincia denuncietur uel per suos compatriotas capiatur Cancellario per consilium electorum tradatur Mutuo eciam dicte communitates ad penam triginta librarum se obligauerunt quod communitas hinc inde manu armata non insurget in aliam et quod communitas alterutra uim inferens armatam si super hoc fuerit conuicta ad dicte pecunie solucionem alteri communitati nomine dampnorum interesse quacumque cohercione per Cancellarium compellatur cauillacionibus omnibus excepcionibus prorsus amotis Quod si aliquos uel aliquem electorum capitaneorum abesse contingit alii de consilio electorum loco sui subrogentur In cuius rei testimonium huic scripto in modum finalis concordie confecto quidam de maioribus iuratis hinc inde sigilla sua sigillum Cancellarii apponi procurarunt ad perpetuam rei memoriam in registro poni fecerunt