Charter Document - 06050005

Omnibus Cristi fidelibus ad quos presens scriptum peruenerit Philippus maior et communa Oxon salutem Nouerit uniuersitas uestra quod cum propter suspendium clericorum mandatis ecclesie per omnia stare iurassemus secundum statutum uenerabilis patris domini Nicholai Tusculanensis episcopi apostolice sedis legati a festo sancti Michaelis anno ab incarnatione domini millesimo ducentesimo quartodecimo usque in decem annos sequentes scolaribus Oxonie studentibus condonauimus medietatem mercedis hospitiorum omnium locandorum clericis in eadem uilla mercedis inquam taxate communi consilio clericorum et nostro ante recessum scolarium propter predictum suspendium clericorum nisi predicti clerici de communi consilio sponte uoluerint quod tercia pars tantum condonetur per quantum tempus uoluerint de predicto decennio Finitis uero predictis decem annis aliis decem annis proximo sequentibus locabimus hospitia sub mercede olim ut predictum est taxata Hec de hospitiis construciis et taxatis ante prefatum recessum clericorum Constructa uero postmodum uel construenda aliaque prius constructa sed non taxata arbitratu quatuor magistrorum et quatuor nostrum taxabuntur et predicto modo per utrumque decennium a nobis locabuntur Iurauimus eciam quod uictualia et alia necessaria iusto et rationabili pretio scolaribus uendemus et ab aliis uendi fideliter procurabimus et quod in fraudem huius prouisionis graues non facienius constitutiones uel onerosas per quas clericorum conditio deterioretur Si uero contingat aliquem clericum a nobis capi statim cum fuerimus super eo requisiti ab episcopo Lincolniensi uel archidiacono loci seu eius officiali uel a cancellario ab episcopo constituto seu ab eo quem episcopus Lincolniensis huic officio deputauerit captum ei secundum debitam regni et ecclesie consuetudinem reddemus nec aliquo modo machinabimur in hiis uel in aliis per quod prefati Lincolniensis episcopi iurisdictio eludatur uel ius suum uel ecclesie sue in aliquo minuatur Iurauerunt etiam quinquaginta de maioribus ex nobis pro nobis omnibus et heredibus nostris quod hec omnia supradicta fideliter obseruabimus Quocumque etiam ex illis quinquaginta mortuo heres ipsius uel alius qui hereditatem suam habuerit semel idem prestabit iuramentum et sic deinceps de herede in heredem Is uero qui pro tempore fuerit maior Oxon pro se et pro communa iurabit singulis annis in festo sancti Michaelis si est annalis coram archidiacono loci et cancellario scolarum Oxon quem episcopus constituent uel ecclesia Lincolniensis cum pastore uacauerit uel coram altero eorum si ambo non interfuerint quod ordinatio a domino Tusculanensi episcopo apostolice sedis legato pro suspendio clericorum facta et autentico suo confirmata fideliter ab ipsa communa obseruabitur Si autem plusquam annalis fuerit sufficiet eum semel iurasse pro toto tempore per quod in maioritate illa durauerit in qua iurauit et sic de maioribus decetero substituendis Hoc idem facient prepositi Oxon singulis annis in festo sancti Michaelis coram iamdictis scilicet archidiacono loci uel Cancellario Oxon uel coram altero eorum Item Bailliui qui pro tempore fuerint sub prepositis constituti de quindena in quindenam ad asisam uille custodiendam iurabunt quod asisam super uictualibus in autentico domini legati contentam fideliter obseruabunt Et in huius rei robur et testimonium omnes subscripti de mandato et uoluntate totius commune pro ipsa communa huic scripto sigilla sua apposuerunt scilicet Petrus filius Galfridi Radulfus Halegod Walterus Ynge Adam Uinetarius Statim post istos quattuor apponantur nomina omnium aliorum qui sigilla sua huic scripto apponent Excipiatur Thoraldus allutarius eo quod misit pro se ad curiam Romanam si excipi potest cum pace et indempnitate negotii Si non apponat ipse sigillum suum cum aliis Sigilletur carta ut dictum est et littere patentes directe domino legato et domino archiepiscopo et suffraganeis eius sigillentur sigillo commune et nobis una cum carta mittantur