Charter Document - 06050003

Uenerabili in Cristo fratri H dei gracia Lincolniensi episcopo N eadem gracia Tusculanensis episcopus apostolice sedis legatus salutem in domino Noueritis quod cum burgenses Oxonie pro suspendio clericorum quod commiserant mandatis ecclesie per omnia stare iurassent nos uolentes agere misericorditer cum eisdem statuimus quod a festo sancti Michaelis anno ab incarnatione domini MCCXIIII usque in decem annos sequentes scolaribus Oxonie studentibus condonetur medietas mercedis hospitiorum omnium locandorum clericis in eadem uilla mercedis inquam taxate communi consilio clericorum et burgensium ante recessum scolarium propter predictum suspendium clericorum Finitis uero predictis decem annis aliis decem annis proximo sequentibus locabuntur hospitia sub mercede olim ut predictum est taxata Hec de hospitiis constructis et taxatis ante prefatum recessum clericorum Constructa uero postmodum uel construenda aliaque prius constructa set non taxata arbitratu quatuor magistrorum et quatuor burgensium taxabuntur et predicto modo per utrumque decennium locabuntur Communa quoque eiusdem uille annuatim in perpetuum dabit quinquaginta duos solidos dispensandos in usus pauperum scolarium per manus abbatis de Osen et Prioris sancte Fritheswide de consilio uestro et successorum uestrorum uel archidiaconi loci seu officialis eius aut cancellarii quem uos uel successores uestri ibidem scolaribus preficietis ita scilicet quod uiginti sex solidi soluentur annuatim in festo Omnium Sanctorum et uiginti sex solidi in capite ieiunii Preter hec etiam eadem communa pascet centum pauperes scolares in pane ceruisia potagio et uno ferculo piscium uel carnium singulis annis in perpetuum die sancti Nicolai quos uos uel successores uestri uel archidiaconus loci seu eius officialis aut ipse cancellarius uel alius ad hoc a uobis uel successoribus uestris deputatus prouiderit lurabunt etiam prefati burgenses quod uictualia et alia necessaria iusto et rationabili precio scolaribus uendent et ab aliis uendi fideliter procurabunt et quod in fraudem huius prouisionis graues non facient constitutiones uel onerosas per quas clericorum conditio deterioretur Si uero contingat aliquem clericum a laicis capi statim cum fuerint super eo requisiti a uobis et successoribus uestris uel archidiacono loci seu eius officiali uel a cancellario seu ab eo quem uos uel successores uestri huic officio deputaueritis captum ei reddent nec aliquo modo machinabuntur in hiis uel in aliis per quod uestra uel successorum uestrorum iurisdiccio eludatur uel ius uestrum uel ecclesie uestre Lincolniensis in aliquo minuatur lurabunt eciam quinquaginta de maioribus Oxon pro se et communa et heredibus suis quod hec omnia supradicta fideliter obseruabuntur et hoc iuramentum quolibet anno renouabunt ad mandatum uestrum uel successorum uestrorum per quot uos uel successores uestri uolueritis citra numerum pretaxatum Cartam quoque sigillo commune signatam sub predictis articulis facient predicti burgenses et uobis liberabunt cui uolueritis in custodia committendam Hec autem facient prefati burgenses et heredes eorum ut clericis honor et reuerentia eo exibeatur abundantius quo magis per eos fuerant dehonestati Magistri uero qui post recessum scolarium irreuerenter legerunt Oxon suspendentur per triennium ab officio legendi ibidem Omnes autem qui de suspendio clericorum confessi fuerunt uel conuicti uenient ad mandatum uestrum cum interdictum fuerit relaxatum ad sepulcra clericorum discalciati et discincti sine capis et palliis sequente eos communa et ipsorum corpora deferent cum honore et reuerencia in cimierio sepelienda ubi clerus prouiderit Prestito igitur ut predictum est a memoratis burgensibus iuramento et carta commune confecta et uobis liberata licenciam habeant scolares et magistri Oxon redeundi et ibidem legendi exceptis hiis qui per triennium sunt suspensi de quibus est premissum Si uero predicti burgenses contra statuta nostra et proprium uenerint iuramentum ex ipso facto se sciant excommunicacionis uinculo innodatos et uos uel successores uestri eos et uillam eorum in pristinam suspensionis sentenciam reducatis Dat apud Rames septimo Kalend lulii