Charter Document - 06050002

N dei gracia Tusculanensis episcopus apostolice sedis legatus omnibus Cristi fidelibus salutem in domino Uniuersitati uestre notum facimus quod cum Burgenses Oxon pro suspendio clericorum quod commiserant mandatis ecclesie per omnia stare iurassent nos uolentes agere misericorditer cum eisdem statuimus quod a festo sancti Michaelis anno ab incarnatione domini MCCXIIII usque in decem annos sequentes scolaribus Oxon studentibus condonetur medietas mercedis hospitiorum omnium locandorum clericis in eadem uilla mercedis inquam taxate communi consilio clericorum et burgensium ante recessum scolarium propter predictum suspendium clericorum Finitis uero predictis decem annis aliis decem annis proximo sequentibus locabuntur hospitia sub mercede olim ut predictum est taxata Hec de hospitiis constructis et taxatis ante prefatum recessum clericorum Constructa uero postmodum uel construenda aliaque prius constructa sed non taxata arbitratu quatuor magistrorum et quatuor burgensium taxabuntur et predicto modo per utrumque decennium locabuntur Communa quoque eiusdem uille annuatim in perpetuum dabit quinquaginta duos solidos dispensandos in usus pauperum scolarium per manus abbatis de Osen et Prioris sancte Fritheswide de consilio uenerabilis fratris Hugonis tunc Lincolniensis episcopi et successorum suorum uel archidiaconi loci seu eius officialis aut cancellarii quem episcopus Lincolniensis ibidem scolaribus preficiet ita scilicet quod uiginti sex solidi soluentur annuatim in festo Omnium Sanctorum et uiginti sex solidi in capite ieiunii Preter hec etiam eadem comuna pascet centum pauperes scolares in pane et ceruisia potagio et uno ferculo piscium uel carnium singulis annis in perpetuum die sancti Nicholai quos episcopus Lincolniensis uel archidiaconus loci seu officialis eius aut ipse cancellarius uel alius ad hoc ab episcopo Lincolniensi deputatus prouiderit lurabunt etiam prefati Burgenses quod uictualia et alia necessaria iusto et rationabili precio scolaribus uendent et ab aliis uendi fideliter procurabunt et quod in fraudem huius prouisionis graues non facient constitutiones uel onerosas per quas clericorum conditio deterioretur Si uero contingat aliquem clericum a laicis capi statim cum fuerint super eo requisiti ab episcopo Lincolniensi uel archidiacono loci seu eius officiali uel a cancellario seu ab eo quem episcopus Lincolniensis huic offitio deputauerit captum ei reddent nec aliquo modo machinabuntur in hiis uel in aliis per quod prefati Lincolniensis episcopi iurisdiccio eludatur uel ius suum uel ecclesie sue in aliquo minuatur Iurabunt autem quinquaginta de maioribus Oxon pro se et communa et heredibus suis quod hec omnia supradicta fideliter obseruabuntur et hoc iuramentum quolibet anno renouabunt ad mandatum episcopi Lincolniensis per quot idem episcopus uoluerit citra numerum pretaxatum Cartam quoque sigillo commune signatam sub predictis articulis facient prefati Burgenses et uenerabili fratri Hugoni tunc episcopo Lincolniensi liberabunt cui uoluerit in custodia committendam Hec autem facient predicti burgenses et heredes eorum ut clericis honor et reuerentia eo exibeatur habundantius quo magis per eos fuerant dehonestati Magistri uero qui post recessum scolarium irreuerenter legerunt Oxon suspendentur per triennium ab officio legendi ibidem Omnes autem qui de suspendio clericorum confessi fuerunt uel conuicti uenient humiliter ad mandatum uenerabilis fratris Hugonis tunc episcopi Lincolniensis cum interdictum fuerit relaxatum ad sepulcra clericorum discalciati et discincti sine capis et palliis sequente eos communa et ipsorum corpora deferent cum honore et reuerencia in cimiterio sepelienda ubi clerus prouiderit Prestito igitur ut predictum est a memoratis Burgensibus iuramento et carta commune confecta et uenerabili fratri Hugoni tunc episcopo Lincolniensi liberata licenciam habeant scolares et magistri Oxon redeundi et ibidem legendi exceptis hiis qui per triennium sunt suspensi de quibus est premissum Si uero predicti Burgenses contra statuta nostra et proprium uenerint iuramentum ex ipso facto se sciant excommunicacionis uinculo innodatos et episcopus Lincolniensis uel successores sui eos et uillam eorum reducant in pristinam suspensionis sentenciam Dat apud Rames septimo kalend lulii