Charter Document - 06011175

Innocentius episcopus servus servorum Dei venerabili fratri episcopo Noviomensi salutem et apostolicam benedictionem Ex parte dilecti filii Petri dicti Quercy et aliorum canonicorum ecclesie Peronensis sibi adherentium fuit propositum coram nobis quod cum bone memorie Prenestinus episcopus tunc in illis partibus apostolice sedis legatus correctionem et reformationem ipsius ecclesie hec dioecesis tam in spiritualibus quam in temporalibus officiali et magistro Jacobo de Bethune canonico Cameracense duxerit committendam iidem mandati formam penitus excedentes quedam de novo in ipsa ecclesia ordinarunt per que antiqua statuta super ejusdem ecclesie statu edita et etiam per bone memorie R Portuensem episcopum tunc Sancti Angeli diaconum cardinalem in iisdem partibus exercentem legationis officium confirmata nec non vallata totius capituli juramento ac antiquas et approbatas memorate ecclesie consuetudines et hactenus pacifice observatas de facto cum de jure nequiverint pro sue voluntatis libitu perperam revocarunt Cumque dicti officialis et magister Jacobus sub pena suspensionis universis mandarent canonicis ut ea omnia que in eadem statuerant ecclesia inviolabiliter observarent dicti Petrus et sibi adherentes eorum obedire mandatis penitus recusantes cum ilia observare non possent sine animarum suarum periculo plurimorum scandalo et non modico ejusdem ecclesie detrimento ad nos coacti sunt habere recursum Nos igitur de te plenam in Domino fiduciam habentes per apostolica scripta mandamus quatenus inquisita super premissis omnibus prout ad tuum spectat officium diligentius veritate statuas super his prout secundum Deum ejusdem ecclesie utilitati ac saluti et quieti famulantium Domino in eadem videris expedire contradictores per censuram ecclesiasticam appellacione postposita compescendo Datum Lugduni II id februarii pontificatus nostri anno III