Charter Document - 06010215
| Charter Number: | 06010215 |
|---|---|
| Cartulary Title: | Charters of St-Fursy of Peronne |
| Charter Language: | Latin |
| Charter Origin: | Papal |
| Charter Type(s): | Declaration |
| Date: | 1289 |
| Date type: | Internal, Calendar, Papal |
| Resource Link(s): |
|
Charter:
Nicolaus episcopus servus servorum Dei Dilectis filiis decano et capitulo ecclesie Sancti Fursei de Perona Noviomensis dioecesis salutem et apostolicam benedictionem Inter ceteros regularis observantie professores fratres ordinis Minorum qui sub extreme pauperitatis onere Conditori omnium famulatum impendere sedulum elegerunt favoribus confovemus uberibus et affectu specialis prosequimur charitatis Attendimus etenim copiosi luminis claritatem qua placiturus in domo Domini memoratus ordo coruscat Consideramus eciam salutares fructus commodaque salubria que fidelium animabus dictorum fratrum celestium contemplationi vacantium pia sollicitudo producit propter quod fidelibus ipsis votivum non immerito [] esse debet ut idem ordo ad laudem divini nominis et humane salutis cumulum continuum suscipiat incrementum Exposita siquidem nobis dilectorum filiorum guardiani et fratrum dicti ordinis ville Peronensis Noviomensis dioecesis petitio continebat quod dilecta in Christo filia Egidia relicta quondam Joannis dicti de Gornay laici dicte dioecesis vidua gerens erga predictum ordinem sincere dilectionis affectum quemdam locum in Villa predicta felicis recordationis Nicolao pape predecessori nostro habitationis et usibus fratrum ejusdem ordinis deputandum pia ac provida liberalitate donavit ilium in jus et proprietatem Romane ecclesie quantum in ea extitit transferendo Cum autem prefati guardianus et fratres ad locum ipsum eorum religioni accommodum cupiant sicut asserunt se transferre ac eis super hoc nostri favoris suffragium cum in eadem villa spiritualis jurisdictio ad vos pertinere dicatur existit vobis medium oportunum [] Universitatem vestram rogamus monemus et hortamur per apostolica vobis scripta mandantes quatenus memoratos guardianum et fratres habeatis pro divina et apostolice sedis ac nostra reverentia propensius commendatos eis super loco predicto nullam turbationem nullamque molestiam per vos vel alium vel alios inferatis nec impediatis ullatenus quominus ipsi juxta privilegiorum tenorem eis et eorum ordini a sede apostolica concessorum possint ad locum eumdem libere se transferre ac in eo divinis laudibus immorari sed potius illos oportunis auxilis et favoribus foveatis sic vos in hoc prompte ac efficaciter habituri Et ipsi ex nostrorum interventu precantium apud vos speratum fructum sibi sentiant provenisse Vos que proinde retributionis divine premium consequi ac sedis apostolice gratiam possitis uberius promereri Datum Rome apud Sanctam Mariam Majorem tertio nonas maii pontificatus nostri anno secundo